Կառավարության այսօրվա նիստում մի շարք ընկերությունների արտոնություններ տրվեցին։ Նախագծերի զեկուցող տնտեսական զարգացման և ներդրումների նախարար Արծվիկ Մինասյանը հայտնեց, որ որոշումներով լրացուցիչ ներդրումներ և աշխատատեղեր կստեղծվեն։
Մասնավորապես, գերակա ոլորտում իրականացվող ներդրումային ծրագրի շրջանակներում ներմուծված տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատելու արտոնությունից օգտվեցին «Ռոք բերի» և «Արման ընդ պարտնյոր» ընկերությունները։
«Սահլեվս» ՍՊԸ-ն էլ ներդրումային ծրագրի շրջանակներում արտոնություն ստացավ՝ ապրանքների ներմուծման դեպքում մաքսային և հարկային մարմինների կողմից հաշվարկված ավելացված արժեքի հարկի գումարների վճարման ժամկետը երեք տարի ժամկետով հետաձգելով, ինչպես նաև «Մեղրի» ազատ տնտեսական գոտում շահագործողի թույլտվություն տրամադրվեց «Բոնվառոն» ընկերությանը։
Վարչապետ Նիկոլ Փաշինյանը նշեց՝ արտոնություններ տալուց պետք է վստահ լինել, որ արդարությունը պահպանվում է։ Նրա խոսքով՝ պետք է այնպես արվի, որ մեկ ընկերությանը արտոնություն տալը հասարակության շրջանում կասկածի տեղիք չտա։
«Մեր առաջնային խնդիրն է բիզնեսին չխանգարելը, հետո նոր օգնելը կամ, այսպես ասած, օգնելով չխանգարելը»,- նշեց վարչապետը։
Vesti.am
