«Ամուլսարի» ծրագրի էկոլոգիական ռիսկերը հայտնվել են նաև միջազգային փորձագետների ու գիտնականների ուշադրության կենտրոնում, որոնք դեռևս անցած տարվա հուլիսին իրենց նշանառության տակ են առել «Լիդիան» ընկերության էլեկտրոնային կայքում առկա փաստաթղթերը:

Միջազգային չորս գիտնական-փորձագետ՝ Ավստրալիայից, ԱՄՆ-ից և Կանադայից, ԱՄՆ-ում բնակվող Հարութ Բրոնոզյանի պատվերով ուսումնասիրել ու հետազոտել են «Լիդիան» ընկերության բոլոր փաստաթղթերը՝ կապված «Ամուլսարի» ծրագրի հետ, ինչն էլ այսօր ներկայացնում էին հայաստանյան բնապահպաններին, ջերմուկցիներին ու խնդրով հետաքրքրված այլ անձանց:

Քննարկմանը ներկա գիտնական Էնն Մաեսթը հավաքվածներին փոխանցեց հանքի շահագործման հետ կապված իրենց կանխատեսումները: Նա ասաց, որ ըստ «Լիդիանի»՝ Ամուլսարում պարզ կառուցվածք ունեցող երկրաբանություն է լինելու, քանի որ վերին ու ստորին շերտի ապարներն իրար հետ կապակցված չեն, այնինչ՝ ըստ իրենց հետազոտությունների՝ վերին շերտի ապարները խառնված ստորին շերտի ապարների հետ: Վերջինս փոխանցեց նաև, որ խնդիր կա ապարների թթվայնության հետ:

«Ըստ ներկայացվածի՝ թթվայնությունը  ցածր է, սակայն մեր հետազոտությունները ցույց են տվել, որ այն ցածր լինել չի կարող: Ապարներում հավասարակշռություն չկա, և ավելի շատ են թթու արտադրող ապարները»,- ասաց տիկին Մաեսթը՝ հավելելով՝ «Լիդիանի» ուսումնասիրությունում, առհասարակ, շատ անորոշություն կա:

Վերջինս տարօրինակ համարեց նաև «Լիդիան» ընկերության այն պնդումը, թե հանքն ազդեցություն չի ունենա Ջերմուկի ու տարածաշրջանի ջրային համակարգի վրա:

«Լիդիանը կանխատեսումներ է արել, թե ինչպիսի ջուր է դուրս գալու կոշտ թափոնների լցակույտից, ինչը մտահոգվելու տեղիք է տալիս: Եվ ստացվում է, որ այս տարածքում անդադար ջրերի մաքրում պետք է իրականացնել»,- ասաց բանախոսը՝ ընդգծելով, որ Ամուլսարի նախագիծը մեծ և բարձր սպառնալիք է տարածաշրջանում առկա ջրային պաշարի որակին:

Քննարկման մյուս բանախոսը՝ գիտնական Անդրե Սոբոլևսկին, նշեց, որ ըստ իր գնահատումների՝ հանքի շահագործումից առաջ եկող հիմնական մտահոգությունն այն է, որ պետք է մաքրվի պոչանյութից առաջացած թթվային ջուրը՝ չթողնելով, որ այն բնական միջավայր հոսի:

«Լիդիանի» առաջարկած միջոցառումները ջրի մաքրման պասիվ համակարգ են ենթադրում, իսկ ես պնդում եմ, որ նման հանքի պարագայում պահանջվում է մաքրման ակտիվ համակարգ»,- ասաց նա:

Բանախոսն ասաց նաև՝ եթե հանքը շահագործվի իսկ հետո որոշում լինի դադարեցնել շահագործումը, ապա նույնիսկ այս հարցում է «Լիադանը» խնդիրներ ունենալու, քանի որ ընկերության ներկայացրած ռեկուլտիվացման ծախսերի համար նախատեսված բյուջեն քիչ է: Իսկ եթե «Լիդիանը» ձախողի, ապա ռեկուլտիվացիոն աշխատանքների համար անհրաժեշտ ծախսերը, ըստ պարոն Սոբոլևսկու, մնալու են հայաստանցիների ուսերին:

Vesti.am