ՀՀ սփյուռքի նախարարության, Համաշխարհային հայկական կոնգրեսի և Ռուսաստանի հայերի միության կողմից իրականացրած «Հայապահպանության գործում նշանակալի ավանդի համար» 2016 թվականի մրցանակաբաշխության հաղթողները «Մայրենիի պաշտպան», «Լավագույն հայկական կրթօջախ», «ԼՂՀ և ՀՀ անկախությունների 25-ամյակին նվիրված լավագույն հրապարակում», Սփյուռքի լրատավամիջոցների մրցույթ, «Սիրում եմ քեզ, ի՛մ հայերնիք» մանկապատանեկան շարադրությունների մրցույթ անվանակարգերում այսօր ստացան իրենց մրցանակները:
«Արդեն 7-րդ տարին է իրականացնում ենք այս մրցանակաբաշխությունը, որի հիմնական նպատակը համայնքների աշխուժացումն է, ոգևորումը, համայնքներին դեպի հայրենիք ձգելը և դա անում ենք խոշոր կառույցներից մեկի՝ Ռուսաստանի հայերի միության և Համաշխարհային հայկական կոնգրեսի հետ: Մեր նպատակն այն է, որ այս մրցանակաբաշխությանը շատերը մասնակցեն»,-նշեց Սփյուռքի նախարար Հրանուշ Հակոբյանը:
Նախարարի խոսքով, քանի որ 2016 թվականը կարևոր տարի էր մեր պետության համար՝ մրցանակաբաշխության անվանակարգերն էլ այդ սկզբունքով է ընտրվել:
«Այսօր ամփոփում ենք արդյունքները, սակայն այն շարունակական կլինի: Կարծում եմ՝ գնալով պետք է մրցանակաբաշխության և՛ աշխարհագրությունը ընդլայնվի, և՛ մասնակցիների թիվը»,- նշեց Հակոբյանը:
Նախարարը Vesti.am-ին տեղեկացրեց, որ մրցանակաբաշխության ընդհանուր ֆոնդը կազմել է 6մլն դրամ:
Էլբակյանը Հասմիկը եկել էր ՌԴ Նովոսիբիրսկի շրջանից, դասավանդում է տեղի կիրակնօրյա դպրոցում, կարևորում է նմանատիպ մրցանակաբաշխությունների կազմակերպումը: Համոզված է, որ դրանք նպաստում և ավելի են զարգացնում հայրենիք-սփյուռք կապերը:
«Շնորհակալություն եմ հայտնում կազմակերպիչներին՝ Սփյուռքի նախարարության և Ռուսաստանի հայերի միությանը՝ Արա Աբրահամյանի գլխավորությամբ: Արա Աբրահամյանն այսօր կապող օղակ է ոչ միայն ՌԴ հայերի, այլև ամբողջ աշխարհի հայերի համար: Այս մրցանակաբաշխությունը մեզ հնարավորություն է տալիս աշխարհասփյուռ հայության հետ շփվելու, հաղորդակցվելու և մտքեր փոխանակելու, իսկ այդ գործում մեծ դերակատարում ունի հենց Արա Աբրահամյանը: Ռուսաստանի հայերի միությունը ՌԴ-ում եղել է միշտ մեր կողքին, ամեն հարցում մեզ աջակցել է, երբեք մերժում չենք ստացել: Նրանք մեզ ուժ են տալիս՝ նոր գաղափարներ իրագործելու համար»,-ասաց Հասմիկը:
Ռուսաստանի հայերի միության և Համաշխարհային կոնգրեսի փոխնախագահ Վլադիմիր Աղայանը շնորհավորեց բոլոր մասնակիցներին և հաղթողներին:
«Երբ բարձրունքից նայում ենք այս մրցանակաբաշխության իմաստին ու բովանդակությանը և աշխարհում տեղի ունեցող իրադարձություններին, կարծես թե, հայապահպանության մրցանակաբաշխության շրջանակներն ընդլայնելու խնդիր է առաջանում»,-նկատեց Աղայանը:
Մերի Մխիթարյանը եկել էր մրցանակը ստանալու ՌԴ Սարատով քաղաքից: Նա մրցանակի էր արժանացել եռագույն տիկնիկների համար, որոնք ներկայացված են եղել հայկական տարազով:
«Երբ խոսում եմ Հայաստանի մասին, միանգամից պատկերացնում եմ Արարատը, գիտեմ, թե այն ինչքան կարևոր է հայերիս համար: Համոզված եմ՝ այն կվերադարձնենք, ժամանակի խնդիր է»,-ասաց Մերին:
Մրցանակաբաշխությունը 2010 թվականից Սփյուռքի նախարարությունն իրականացնում է Համաշխարհային հայկական կոնգրեսի և Ռուսաստանի հայերի միության հետ համատեղ: 2010-2016թթ. մրցանակաբաշխության մասնակիցների ընդհանուր թիվը կազմել է 877՝ 45 երկրից:
Լուսանկարները՝ Աստղիկ Հովհաննիսյանի
Դուսյա Ղազարյան
Vesti.am
