Հայաստանի՝ ԵՄ-ին միանալու ձգտումը երկրի օրինական իրավունքն է, սակայն դա դժվարություններ է ստեղծում, այդ թվում՝ ԵԱՏՄ-ին անդամակցության պատճառով առաջացած դժվարությունները: Այս մասին Բիշքեկում ՀՀ վարչապետ Նիկոլ Փաշինյանի հետ հանդիպման ժամանակ հայտարարել է ՌԴ նախագահ Վլադիմիր Պուտինը։
«Որքան շուտ Հայաստանը որոշում կայացնի ԵՄ-ին միանալու հարցում, այնքան լավ։ Մոսկվան պետք է հասկանա, թե ինչպես զարգացնել հետագա հարաբերությունները: Մեկ այլ կազմակերպությանը միանալու ընթացակարգի մեկնարկի մասին օրենքի ընդունումը նշանակում է Եվրասիական տնտեսական միությունից դուրս գալու մասին հայտարարություն»,- ասել է նա։
ՌԴ նախագահի խոսքով՝ ԵԱՏՄ-ին անդամակցելուց ի վեր Հայաստանի ՀՆԱ-ն եռապատկվել է, իսկ միության երկրներ արտահանումը՝ տասնապատկվել․
«Ռուսաստանը Հայաստանի հիմնական տնտեսական գործընկերն է։ 2026 թվականի սկզբից ի վեր երկրների միջև առևտրաշրջանառությունը կազմել է 2,5 միլիարդ դոլար։ Ռուսական ընկերությունները Հայաստանի բյուջեի խոշորագույն հարկատուներն են և ամրապնդում են երկրի էներգետիկ անվտանգությունը»,- ասել է Պուտինը։
ՌԴ նախագահը շեշտել է, որ Մոսկվան միշտ էլ կողմ է եղել Երևանի հետ բարեկամական և փոխշահավետ հարաբերությունների զարգացմանը․ «Սա համապատասխանում է Ռուսաստանի Դաշնության և հայ ժողովրդի հիմնարար շահերին»,- ավելացրել է ՌԴ նախագահը։
