Օգոստոսի 8-ին տեղի է ունեցել ՀՀ վարչապետի հովանու ներքո ուժային կառույցների միջև անցկացվող 4-րդ բանակային խաղերի պարգևատրման հանդիսավոր արարողությունը։
Մասնակցել են ուժային կառույցների և իրավապահ մարմինների ավելի քան 280 ներկայացուցիչ:
Բանակային խաղերի ծրագրում ներառված էին ռազմամարզական քառամարտ, ռազմականացված կրոսավազք, ռազմականացված կրոսավազքի փոխանցումավազք, ռազմամարզական կողմնորոշում, «ԱԿ-103» ինքնաձիգով, «ՊՄ» ատրճանակով և «ԴԴ» հրացանով հրաձգություն մարզաձևերը։
Ներքին գործերի նախարար Արփինե Սարգսյանը պարգևատրել է «ՊՄ» ատրճանակով հրաձգություն մարզաձևում մրցանակային տարբեր տեղեր զբաղեցրած կանանց և տղամարդկանց թիմերին։
Անհատական մրցապայքարում և տարբեր մրցաձևերում առաջին երեք հորիզոնականները զբաղեցրած ՆԳՆ աշխատակիցները արժանացել են մեդալների, պատվոգրերի և դրամական խրախուսանքների։
«ԴԴ» հրացանով հրաձգություն մարզաձևում առաջին տեղերն են զբաղեցրել Հովհաննես Խաչատրյանը և Ալիսա Ազարյանը՝ սահմանելով բանակային խաղերի ռեկորդներ և գրանցելով այս մարզաձևում խաղերի պատմության ամենաբարձր արդյունքները։ Դավիթ Սիլանյանն այս մարզաձևում գրավել է երկրորդ տեղը։
«ՊՄ» ատրճանակով հրաձգություն մարզաձևում Քրիստինե Թորոսյանը և Մարինե Այվազյանը զբաղեցրել են երկրորդ տեղերը։
Ռազմամարզական կողմնորոշում մարզաձևում Մելինե Զաքարյանը զբաղեցրել է երրորդ տեղը։
Պարգևատրման արարողությանը ներկա էին ՀՀ վարչապետ Նիկոլ Փաշինյանը, Կառավարության անդամներ, պետական կառույցների ղեկավարներ և այլ պաշտոնատար անձինք։
Վարչապետ Նիկոլ Փաշինյանը շնորհավորել է խաղերի մասնակիցներին և մրցանակակիրներին՝ կարևորելով նման միջոցառումների անցկացումը։
4-րդ բանակային խաղերը կազմակերպվել էր ՀՀ կրթության, գիտության, մշակույթի և սպորտի նախարարության կողմից՝ Պաշտպանության նախարարության հետ համագործակցությամբ։
Շնորհավորում ենք Ներքին գործերի նախարարության թիմին և 4-րդ բանակային խաղերի բոլոր մրցանակակիրներին`մաղթելով նորանոր հաղթանակներ։
