Ապօրինի պահվող զենք-զինամթերք կամավոր հանձնելու դեպք է գրանցվել Քրեական ոստիկանության Գեղարքունիքի մարզային վարչության ծառայողների բացատրական աշխատանքի շնորհիվ։

Ոստիկանություն զանգած քաղաքացին հայտնել էր, որ զենք-զինամթերք է թողել Գավառ քաղաքի կամրջի մերձակայքում։ Նշված վայրում հայտնաբերվել են «ԱԿ-74» տիպի ինքնաձիգ, ատրճանակ, 2 նռնակ և տարբեր տրամաչափի 193 փամփուշտ։

Ապօրինի պահվող զենք-զինամթերք կամավոր հանձնելու դեպք է գրանցվել նաև Վայոց ձորի մարզի քրեական ոստիկանների բացատրական աշխատանքի շնորհիվ։ Քաղաքացին զենք-զինամթերք էր թողել Եղեգնաձոր քաղաքում՝  աղբյուրի հարակից տարածքում գտնվող կիսակառույց տնակի մոտ։ Նշված տարածքում հայտնաբերվել են «ՌԿՊ» տեսակի գնդացիր, «ՏՕԶ» տեսակի ակոսափող հրացան, «Ֆ-1» տեսակի 2 նռնակ՝ պայթուցիչներով, և 30 փամփուշտով լիցքավորված ինքնաձիգի պահունակ։

Ապօրինի պահվող զենք-զինամթերք է հանձնվել նաև Համայնքային ոստիկանության Մարաշի բաժնի ծառայողների բացատրական աշխատանքի շնորհիվ։ Ոստիկանություն զանգած քաղաքացին հայտնել էր, որ զենք-զինամթերք է թողել Սարալանջի փողոցի հասցեներից մեկի հարակից տարածքում։ Նշված վայրում հայտնաբերվել են որսորդական 3 հրացան, ինքնաձիգ, ատրճանակ, նռնականետ, արկ և տարբեր տրամաչափի փամփուշտներ։

ՆԳՆ ոստիկանությունը հորդորում է քրեական պատասխանատվությունից խուսափելու համար կամավոր հանձնել ապօրինի պահվող զենք-զինամթերքը։