Արցախի Հանրապետության Ազգային ժողովի նախագահ Աշոտ Դանիելյանի ցավակցական ուղերձը Զորի Բալայանի մահվան կապակցությամբ.
«Արցախի իշխանությունների և անձամբ իմ անունից մեր խորին ցավակցությունն ենք հայտնում Արցախի հերոս Զորի Բալայանի ընտանիքին, հարազատներին և պայքարի ընկերներին՝ կրած ծանր կորստի համար։
Զորի Բալայանը, որպես մտավորական և հասարակական գործիչ, եղել է արցախյան շարժման ակունքներում։ Իր բեղմնավոր գործունեությամբ միշտ կանգնած է եղել Արցախի ժողովրդի կողքին՝ Արցախի պետության կերտման և զարգացման գործում։ Իր իմաստուն խորհուրդներով և աշխարհասփյուռ հեղինակությամբ սատարել է պետականաշինության գործին:
Սիրելի Զորի Հայկի,
Ձեր ընտրած կյանքի ուղին յուրաքանչյուր արցախցու համար ընդօրինակելի է։ Ուժ և կորով ենք մաղթում բոլոր նրանց, ովքեր հավատարիմ են Արցախի ազատագրության պայքարի խորհրդին, որի ակունքների կուռ արմատներից մեկը՝ հանձինս Զորի Բալայանի, կորցրեցինք բոլորս»։
