ԱՄՆ առաջին տիկին Մելանյա Թրամփը Նյու Յորքում կնախագահի ՄԱԿ-ի անվտանգության խորհրդի մարտի 2-ի նիստը. սա համընկնում է ԱՄՆ-ի կողմից Խորհրդի նախագահության ստանձնման հետ։ «Արմենպրես»-ի փոխանցմամբ՝ այս մասին հաղորդում է CNN-ը։

Նշվում է, որ ըստ առաջին տիկնոջ գրասենյակի հայտարարության՝ սա նման առաջին դեպքը կլինի, երբ ԱՄՆ առաջին տիկինը կնախագահի Անվտանգության խորհրդի նիստը։ Նիստի մասնակիցները կքննարկեն կրթությունը, տեխնոլոգիաները, խաղաղությունը և անվտանգությունը։

Նիստի խորագիրն է «Երեխաները, տեխնոլոգիաները և կրթությունը հակամարտության ժամանակ»։

Մելանյա Թրամփը մեծ հետաքրքրություն է ցուցաբերել Ռուսաստանի և Ուկրաինայի միջև պատերազմի ընթացքում ենթադրաբար առևանգված ուկրաինացի երեխաների՝ ընտանիքների հետ վերամիավորման հանդեպ։ Փետրվարի 12-ին նրա գրասենյակը հայտարարել էր, որ Մելանյա Թրամփի օգնությամբ հինգ ուկրաինացի երեխա և 1 ռուս երեխա վերադարձվել են իրենց ծնողներին։