Եվրոպական արտաքին գործողությունների ծառայությունը (EEAS) «ռուս դիվանագետների հետ շփվելու հրահանգներ» է ուղարկել Ժնևում ՄԱԿ-ի պետությունների մշտական ներկայացուցչություններին։ Այս մասին ՌԻԱ Նովոստիին հայտնել է դիվանագիտական աղբյուրը։
Հրահանգները ուղարկվել են Ժնևում գտնվող ՄԱԿ-ում Եվրոպական Միության մշտական ներկայացուցչությանը, որը դրանք տարածել է այլ առաքելություններին։
ԵԱԳԾ-ի փաստաթուղթը ցուցումներ է պարունակում, թե «ինչպես շփվել ռուս դիվանագետների հետ»։ Մասնավորապես, խորհուրդ է տրվում «խուսափել այն միջոցառումներից, որոնց մասնակցում են ռուս դիվանագետները», իսկ եթե հայտնվել եք նման միջոցառմանը՝ «ապա չհայտնվել տեսախցիկի առաջ ռուս դիվանագետների հետ»։
Աղբյուրի փոխանցմամբ՝ սա ԵԱԳԾ-ի կողմից տարածվող արդեն երկրորդ նմանատիպ փաստաթուղթն է։
Նշվում է, որ ռուս դիվանագիտական ներկայացուցչության աշխատակիցներն արդեն զգացել են այդ միջոցառումների ազդեցությունը։ Այսպիսով, հանդիպումների ժամանակ նրանց դադարել են ձեռք մեկնել և նույնիսկ խնդրել են հեռանալ մի դիվանագիտական ներկայացուցչության կողմից կազմակերպված միջոցառումից։
