97 տարեկանում կյանքից հեռացել է ամերիկացի գիտնական Ջեյմս Ուոթսոնը, որը Նոբելյան մրցանակի է արժանացել ԴՆԹ-ի կառուցվածքի վերաբերյալ իր աշխատանքի համար, հայտնում է BBC-ն՝ միաժամանակ հիշեցնելով, որ ամերիկացի գիտնականը հայտնի էր նաև ռասայական տարբերությունների վերաբերյալ իր վիճահարույց հայտարարություններով, որոնք հանգեցրին նրա աշխատանքից ազատմանը և ակադեմիական կոչումներից զրկվելուն։
Գիտնականի որդին հայտնել է, որ Ջեյմս Ուոթսոնը մահացել է կարճատև հիվանդությունից հետո:
Ուոթսոնի հայտնագործությունը համարվում է 20-րդ դարի ամենակարևոր գիտական նվաճումներից մեկը։ 1953 թվականին նա հաջողությամբ նկարագրել է ԴՆԹ մոլեկուլի կրկնակի պարույրային կառուցվածքը. նա և բրիտանացի գիտնական Ֆրենսիս Քրիքը համագործակցել են այս աշխատանքի վրա։
Ուոթսոնի հետազոտությունները հիմք են դրել մոլեկուլային կենսաբանության արագ զարգացմանը, և 1962 թվականին նա, Քրիքը և բրիտանացի կենսաֆիզիկոս Մորիս Ուիլկինսը կիսել են Նոբելյան մրցանակն իրենց աշխատանքի համար։
