Հիմք ընդունելով Ազգային վիճակագրական ծառայության տվյալները՝ տնտեսագետ Թաթուլ Մանասերյանը կարծիք է հայտնում, որ  2015թ. Հայաստանը տնտեսական աճ ապահովելու և արտահանման ծավալների մեծացմանը միտված մի շարք ծրագրեր է իրականացրել:

Տնտեսագետի դիտարկմամբ՝ Հայաստանի տնտեսական դժվարությունները կապվում էին Եվրասիական տնտեսական միությանը Հայաստանի անդամակցության և ՌԴ-ի դժվարությունների հետ: Մանասերյանի խոսքով՝  2015-ին չարդարացված սպասելիքները պետք է  իրականացնել 2016-ին:

-Առաջինը պետք է սկսենք արտաքին միջավայրից` այն երկրներից, որտեղ արժույթների գերարժեզրկում է եղել, հումք ներկրել և Հայաստանում վերամշակող արտադրություն կազմակերպել` ապահովելով պետության աջակցությունը՝ արտադրանքն ուղղելով ԵՄ երկրներ և ԱՄՆ – լրագրողների հետ հանդիպման ժամանակ ասել է տնտեսագետը:

Ըստ նրա՝ Հայաստանը մի քանի ոլորտ  ունի, որոնցով կարող է ներկայանալ ԵԱՏՄ երկրների շուկաներին:

-Ինովացիոն տեխնոլոգիաների լավ շուկա կա ԵԱՏՄ երկրներում: Այդ երկրներում մեզ նայում են, որպես աջակցություն ակնկալող երկիր, բայց մենք մեր ներուժն ունենք և կարող ենք այն մատուցել, -նշել է Մանասերյանը՝ հավելելով, որ  Առողջապահության ոլորտում ևս  հաջողություններ ունենք, որոնք կարելի է ներկայացնել: Ըստ նրա՝ դա կարող է Հայաստանը տարածաշրջանում գիտակրթական կենտրոն դարձնել:

Vesti.am