Իսրայելի վարչապետ Բենյամին Նեթանյահուն մտադիր է ապրիլի 7-ին այցով ժամանել Վաշինգտոն: Այս մասին հայտնում է Axios պորտալը՝ հղում անելով իրազեկ աղբյուրներին։
Ըստ նախնական տեղեկությունների՝ ԱՄՆ նախագահ Դոնալդ Թրամփի հետ բանակցությունների հիմնական թեմաները լինելու են սակագնային տուրքերը, Գազայի հատվածում տիրող իրավիճակը, ինչպես նաև Իրանի դեմ հնարավոր գործողությունները:
Նշվում է նաև, որ Նեթանյահուն կդառնա առաջին օտարերկրյա առաջնորդը, որն անձամբ կհանդիպի նախագահ Թրամփի հետ, որպեսզի փորձի համաձայնության գալ սակագների վերացման գործարքի շուրջ, որը Վաշինգտոնը սահմանել է աշխարհի գրեթե բոլոր երկրների համար:
