Երևան քաղաքի  Ավան և Նոր-Նորքի ընդհանուր իրավասության դատարանում՝ դատավոր Գարիկ Աբելյանի նախագահությամբ, այս  պահին դռնփակ  քննվում է հասարակական գործիչ  Էդգար Ղազարյանի նկատմամբ որպես խափանման միջոց վարչական հսկողությունը կիրառելու մասին նախաքննական մարմնի միջնորդությունը։

Դատարանի մուտքի մոտ հավաքվել են բազմաթիվ քաղաքացիներ, հասարակական, քաղաքական գործիչներ՝ ի պաշտպանություն Էդգար Ղազարյանի։

ՀՀ ԱԺ «ՊՈՒ»  խմբակցության ղեկավար  Հայկ Մամիջանյանը  Էդգար Ղազարյանի նկատմամբ քրեական հետապնդման որպես «հայցվոր» համարում է Նիկոլ Փաշինյանին։

«Այս 7 տարիների այնքան բան է արել, որ  այլեւս Փաշինյանի արածներից ոչ մի բանի վրա չենք զարմանում։  Երբ ուրանում է ցեղասպանության հարցը, Արցախը, կատարում է Ադրբեջանի պահանջները, ուրիշ ինչ չպետք է անի, կա՞ ինչ որ բան, որ Փաշինյանը չի անի»,- նշել է Մամիջանյանցը՝ ավելացնելով, որ նա (Ն.Փաշինյանը-խմբ.) միայն խելքը գլխին  չի անի։

 Ինչ վերաբերում է Էդգար Ղազարյանի դեմ հարուցված հետապնդմանը, ապա, Հ. Մամիջանյանի գնահատմամբ, դա վտանգավոր է ոչ միայն նրա համար, որ Էդգար Ղազարյանը օրվա իշխանության ակտիվ քննադատողներից է,  այլ այս նախադեպը կարող է դառնալ մահակ՝ բոլոր քաղաքական,  հասարակական գործիչների համար, որոնք, պարզապես իրենց քաղաքական հայացքներից, հայրենասիրական արժեհամակարգից ելնելով, տեղեկատվություն տրամադրելու համար կարող են  նման շինծու գործերով հետապնդվել։

Այդուհանդերձ, Մամիջանյանը համոզմունք է հայտնել, որ  Ղազարյանին նման քայլերը չեն կարող վախեցնել։