ՀՀ կառավարությունը Ազգային ժողով էր ներկայացրել 2024 թ. օգոստոսի 30-ին ստորագրված «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի և Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը։ ԱԺ ընդդիմադիր խմբակցությունները չմասնակցեցին կանոնակարգի քննարկմանը։ Հայաստանի հանրապետական կուսակցությունը հայտարարություն տարածեց և կանոնակարգն անվանեց հակապետական գործողությունների հերթական քայլը։

«Այդ կանոնակարգի վավերացմամբ՝ գործող վարչախումբը շտապում է իրավական շղարշ հաղորդել Ադրբեջանի թելադրանքով իրականացվող՝ Հայաստանի Հանրապետության տարածքային ամբողջականությունը խաթարող և հետագա տարածքային լրջագույն զիջումներ պարունակող գործընթացին։ Կատարելով վարչախմբի պատվերը, Սահմանադրական դատարանը, առանց որևէ կերպ անդրադառնալու բուն խնդրին՝ կանոնակարգի դրույթների համապատասխանությանը Սահմանադրությանը, կամայական մեկնաբանությունների միջոցով փաստացի փոխել է Հայաստանի Հանրապետության Սահմանադրության նախաբանը՝ դրանից հանելով մեր Սահմանադրության հիմքը հանդիսացող «Հայաստանի անկախության մասին հռչակագրում հաստատագրված հայոց պետականության հիմնարար սկզբունքները և համազգային նպատակները»»,- նշված է ՀՀԿ ԳՄ հայտարարությունում:

ՀՀԿ-ն մտահոգություն է հայտնում, որ «Սահմանադրական դատարանի այս խայտառակ որոշումը, անկասկած, օգտագործվելու է Հայաստանի վարչախմբի կողմից՝ իր հետագա կապիտուլյանտական քաղաքականությունը «լեգիտիմացնելու» նպատակով»։

ՀՀԿ անդամ, ԱԺ «Պատիվ ունեմ» խմբակցության ղեկավար Հայկ Մամիջանյանը Vesti.am-ի հետ զրույցում մանրամասն նկարագրեց, թե որտե՞ղ և ի՞նչ վտանգներ են տեսնում։ «Ինչի համար է մի փաստաթուղթ, որը որևէ տրամաբանությամբ չպիտի անցներ վարերացման այս փուլերը՝ ՍԴ-ԱԺ-նախագահ, անցնում է դրանք։ Այն, ո՛չ փաստթղթի պահանջ է, ո՛չ էլ՝ մեր օրենսդրության, ապա անհասկանելի է, թե ինչո՞ւ է այն անցնում այս փուլերով։ Եթե նույնիսկ որոշել են այս սխալ ընթացակարգով գնալ, ապա ծագում է հաջորդ հարցը՝ ինչո՞ւ է Սահմանադրական դատարանը պատասխանում լրիվ այլ հարցի։ ՍԴ-ին հարցնում են, քանի տարեկան ես, ինքը պատասխանում է՝ մածունը սպիտակ է: Ինչո՞վ է պայմանավորված ՍԴ որոշման մեջ հղումը՝ Անկախության հռչակագրին․ դա ՍԴ-ին չէին հարցրել։ Համադրելով այս երկու փաստերը՝ վավերացման չենթակա փաստաթուղթը վավերացման բերելը և ՍԴ-ի անձագանքը մի բանի, որն իրեն չէին հարցրել,  մենք մտածում ենք, որ սրանով պատրաստվում է իբր իրավական հիմք՝ հետագա հակապետական զիջումների համար։ Իսկ թե ինչպե՞ս կարող են արտահայտվել այդ զիջումները՝ ամենաթարմ օրինակը Կիրանցն է, երբ ՀՀ տարածքից հողեր հանձնվեցին և դա մանիպուլատիվ փորձում են ներկայացնել այլ կերպ։ Նույն է, երբ լրագրողից խլեմ խոսափողը, ասեմ այլևս չեմ տալիս և խմբագրություն գնալով՝ լրագրողն ասի, որ այդ խոսափողը երբեք էլ իրենը չի եղել։ Հիմա ՀՀ-ում նույն է՝ խլել են մեր տարածքը, իսկ ՀՀ իշխանությունն ասում է, այդ տարածքները երբեք էլ մերը չեն եղել։ Սա արվում է նրա համար, որ հետագայում ասի, թե այս կամ դրույթը նշված է կանոնակարգում, որն անցել է ՍԴ—ԱԺ—նախագահ վավերացման ճանապարհով և լեգիտիմ է»,-ասաց Մամիջանյանը։

Մամիջանյանի խոսքով՝ ընդդիմադիր պատգամավորները կանոնակարգի քննարկամանը որևէ կերպ չմասնակցեցին, քանի որ չէին ցանկանում, որևէ կերպ լեգիտիմացնել այս հակապետական գործընթացը։ Որպես խնդրի լուծում՝ կրկին տեսնում են իշխանափոխությունը և հաստատակամ ասում, որ այս տարիների ընթացքում ամեն ինչ արել են և շարունակելու են հնարավոր ամենը՝ միչև ՀՀ-ում իշխանափոխության հասնելը։