Մայիսի 26-ին Երևանում Հավաքական անվտանգության պայմանագրի կազմակերպության անդամ պետությունների թմրամիջոցների ապօրինի շրջանառության դեմ պայքարի իրավասու մարմինների ղեկավարների համակարգող խորհրդի նախագահ, Ռուսաստանի ներքին գործերի փոխնախարար, ոստիկանության գեներալ-գնդապետ Անդրեյ Խրապովը և Հայաստանի ՆԳ նախարարը Վահե Ղազարյանն ամփոփել են ՀԱՊԿ ենթատարածաշրջանային հակաթմրամոլային «Կանալ-Արաքս» գործողության նախնական արդյունքները։
Ինչպես NEWS.am -ին հայտնեցին ՀԱՊԿ մամուլի ծառայությունից, գործողությունն իրականացվել է 2023 թվականի մայիսի 22-ից 26-ը ՀԱՊԿ անդամ երկրների տարածքում՝ ՀԱՊԿ թմրամիջոցների, նոր հոգեներգործուն և ուժեղ ազդեցություն ունեցող նյութերի մատակարարումը կանխելու նպատակով։
Գործողության կառավարման միջազգային համակարգող շտաբը տեղակայվել է Երևանում գտնվող Հայաստանի ՆԳՆ ոստիկանության կրթահամալիրի բազայի վրա։
Գործողությանը ներգրավվել է իրավասու մարմինների մոտ 10 հազար աշխատակից։
Համակարգված գործողությունների արդյունքում, ըստ նախնական տվյալների, ՀԱՊԿ անդամ երկրների տարածքում ապօրինի շրջանառությունից առգրավվել է ավելի քան 816 կգ թմրանյութ, որից ավելի քան 143 կգ մարիխուանա, ավելի քան 311 կգ թմրանյութ պարունակող բույսեր, մոտ 30 կգ հաշիշ, ավելի քան 20 կգ մեֆեդրոն, 2,4 կգ հերոին, 10,2 կգ հոգեմետ նյութեր։
Բացահայտվել է թմրամիջոցների հետ կապված 548 հանցագործություն։ Բացահայտվել է թմրանյութերի շրջանառությամբ զբաղվող 88 հանցախումբ: Թմրամիջոցների հետ կապված ապօրինի գործողությունների համար վարչական պատասխանատվության է ենթարկվել 347 մարդ: Թմրամիջոցների ապօրինի շրջանառության ոլորտում հանցագործություններ կատարելու համար բերման է ենթարկվել 88 հետախուզվող: Հայտնաբերվել է 430 ինտերնետային կայք, որոնց միջոցով իրականացվել է թմրամիջոցների հետ կապված արգելված տեղեկատվության տարածումը։ Օրինախախտներից առգրավվել է 20 հրազեն և 410 միավոր զինամթերք։
Բացահայտվել և կասեցվել են թմրամիջոցների մաքսանենգության մի քանի ուղիներ, լուծարվել են բարձր արտադրողականությամբ 3 դեղորայքային լաբորատորիաներ։ Միասին բացահայտվել է մեծ անդրազգային կազմակերպված հանցավոր խմբավորում:
Գործողության ընթացքում լայնորեն կիրառվել են տեսչական սարքավորումներ, անօդաչու թռչող սարքեր և շներ։
Ավելի քան 300 ֆիզիկական անձանց մոտ կասկածելի ֆինանսական գործարքներ են հայտնաբերել՝ կապված դրամական միջոցների տարանցման հետ՝ ավելի քան 750 միլիոն ռուբլու չափով բանկային քարտերի եւ կրիպտոարժույթով գործարքների կիրառմամբ:
