Արցախում տեղակայված ռուս խաղաղապահների շտաբում այսօր հանդիպել են Արցախի և Ադրբեջանի ներկայացուցիչները։ «Արցախպրես» լրատվական գործակալությանը Արցախում տեղակայված ռուս խաղաղապահ զորակազմի հրամանատարությունից հայտնել են, որ քննարկվել են էլեկտրամատակարարման և գազի անխափան մատակարարման հարցերը։ «Բացի այդ, հանդիպման շրջանակներում քննարկվել է Դրմբոնի և Կաշենի հանքավայրերում ադրբեջանական կողմի ներկայացուցիչների կողմից շրջակա միջավայրի մոնիտորինգի հնարավորությունը»,- փոխանցում է Արցախպրեսը։

Ադրբեջանցիներն էլ հայտնոււմ են՝ Ադրբեջանի խորհրդարանի պատգամավոր Ռամին Մամեդովը նշանակվել է Ադրբեջանի «Ղարաբաղի շրջանում» բնակվող հայ բնակիչների հետ կապերի պատասխանատու։

Իսկ թե ո՞վ է արցախահայության ներկայացուցիչը որևէ մեկը չի հայտնում՝ ո՛չ հայկական կողմը, ո՛չ ռուսական և ո՛չ էլ ադրբեջանական։ Մի քանի օր է, ինչ բոլորը հետաքրքրված են, թե ով է բանակցնում Արցախի անունից։  Աշխարհում կա ֆիլմերի 7 թափառող սյուժե, որոնցից մեկն հենց այն է, որ հերոսը գործում է թաքնված և միայն ֆիլմի վերջում է հայտվում։ Ըստ սյուժեի՝ դա սովորաբար լինում է բացասական կերպարը, որը վերջում բնականաբար, պատժվում է։ Կարևոր է նաև այն, որ այդ բացասկան կերպարը՝ պայմանական «Ռուդոլֆը», կա՛մ ինքն է ոչնչացնում իր թիմակիցներին, կա՛մ նրան պատժելու համար բարի հերոսները նախ ոչնչացնում են թիմակիցներին, հետո նոր հաջողվում է իրեն գտնել։ Արցախում ևս այդ «Ռուդոլֆին» են փնտրում։ Եթե իմանայինք, թե ո՞վ է «Ռուդոլֆը» հնարավոր կլիներ պարզել Արցախպրեսի և Ադրբեջանի հայտարարւթյունների անհամատեղելիությունը։ Արցախպրես-ն ասում է՝ քննարկել են գազի, լույսի անջատումների հետ կապված հարցեր, իսկ մյուս կողմն ասում է՝ նախնական քննարկումներ են ծավալվել Ղարաբաղի մարզի հայ բնակիչների՝ Ադրբեջանի Հանրապետությանը վերաինտեգրման վերաբերյալ՝ Ադրբեջանի Սահմանադրությանը և օրենքներին համապատասխան։ Իսկ գուցե «Ռուդոլֆի» արցախյան թիմի ներկայացուցիչնե՞րը պատասխանեն։ Նրանք լռում են, իսկ մամուլի հետ շփումը՝ բացառում։

Հնարավոր է, որ «Ռուդոլֆը» բանակցում է այն, ինչ ուզում է կամ ինչ պետք է, բայց ֆիլմի սյուժեն լավ ավարտ չի հուշում։