Վերջին շրջանում տարածված են շուր շնչառական վարակները: Դրանցից հնարավորինս խուսափելու և կանխագելելու վերաբերյալ հարցերին է պատասխանում Երևան բժշկական կենտրոնի բժիշկ, թերապևտ Անահիտ Պավլիկի Դավթյանը:

-Տիկի՛ն Դավթյան, ի՞նչ են իրենցից ներկայացնում սուր շնչառական վարակները  ի՞նչ տարածվածություն ունեն:

Սուր շնչառական վարակները շրջանառվում են աշխարհի բոլոր մասերում, բնորոշվում են սեզոնայնությամբ, առավելապես բռնկումներ լինում են աշնանը և ձմռանը: Տարածված են վիրուսների հետևյալ  տեսակները՝  գրիպի վիրուսների  4 տեսակ՝ A-ն իր ենթատիպերով H1-N1, H3N2…, B, C և D, ինչպես նաև  ադենովիրուսներ, ռեսպիրատորսինտիցիալ վիրուսային վարակ:

Ովքե՞ր են ավելի հաճախ հիվանդացողները:

Կարող են հիվանդանալ բոլորը, սակայն ռիսկային խմբերում են՝ 

հղի կանայք, մինչև 59 ամսական երեխաները,  տարեցները, քրոնիկական հիվանդություններով անձինք:

 Չեմ ուզում բաց թողնել նաև բուժանձնակազմին, ովքեր ամենօրյա շփում ունեն մեծ թվով պացիենտների հետ և կարող են ինչպես վարակվել այնպես էլ վարակը տարածել:

Որտե՞ղ և ինչպե՞ս է տեղի ունենում վարակումը:

Վիրուսներն ունեն մեծ կոնտագիոզություն՝ հեշտ և արագ տարածվում են մարդաշատ, փակ վայրերում, ինչպիսիք են մանկապարտեզները,  դպրոցները և ծերանոցները:

Երբ վարակված անձը հազում կամ փռշտում է, վիրուսներ պարունակող կաթիլները  ցրվում են օդում (կարող են տարածվել մինչև մեկ մետր) և վարակում  մարդկանց: Վարակվել հնարավոր է  նաև , երբ որևէ մակերեսից  ձեռքերի միջոցով վարակն անցնում է  դեպի քիթ, բերան և աչքեր:

Ինչպե՞ս է արտահայտվում

Զգացվում է ջերմություն, թուլություն, մկանային ցավեր, գլխացավ քթահոսություն, կոկորդի ցավ, հազ, ցավ ականջներում, դժվարացած շնչառություն:

Ե՞րբ է անձը վարակիչ:

Անձը վարակիչ է ախտանիշների ի հայտ գալուց մոտ մեկ օր առաջ մինչև  չորրորդ օրը:

Ինչպե՞ս կանխարգելել:

Քանի որ գրիպի վիրուսները մշտապես ենթարկվում են մուտացիայի, պարբերաբար հայտնվում են նոր շտամներ, հետևաբար առաջին կանխարգելիչ միջոցը դա լայնատարած ամենամյա վակցինացիան է, որը կանխարգելում է  նաև բարդությունների առաջացումը: Շատ կարևոր է  փակ տարածքներում  կանոնավոր օդափոխության ապահովվումը, պարբերաբար ձեռքերը լվանալը, դիմակ կրելը, հիվանդության ախտանիշների դեպքում  մարդաշատ վայրեր չհաճախելը, սոցիալական հեռավորություն պահպանելը,  հազալիս  կամ փռշտալիս անձեռոցիկով  բերանը և քիթը ծածկելը:

Նշեմ նաև այն, որ ժողովրդական խոսքը, թե ձյան առատ տեղումների դեպքում վարակը նահանջում է` գիտական հիմք չունի ՝ միֆ է:

Ինքնաբուժո՞ ւմ, թե՞ բուժում

Բուժումը պետք է բժշկիկ կողմից նշանակված լինի: Արդի ամենակարևոր խնդիրներից է  անտիբիոտիկների անկառավարելի  և անհիմն օգտագործումը վիրուսային վարակների ժամանակ: Վիրուսային հիվանդությունները բուժվում են հակավիրուսային դեղորայքով կամ երբեմն պահանջվում է սիմպտոմատիկ բուժում: Ցուցված են առատ, տաք հեղուկներ, 38-38.5օC-ից բարձր ջերմության պարագայում՝ ջերմիջեցնողներ:

ՀԻՇԵԼ,  որ պետք չէ զբաղվել ինքնաբուժությամբ և ժամանակին  է պետք դիմել բժշկի: