Էներգետիկ անվտանգության հարցերով
փորձագետ Վահե Դավթյանն այսօր կարծիք է հայտնել,
որ ԵՄ դիտորդական առաքելությունը գալիս է
«Զանգեզուրյան միջանցքի» բացումը սպասարկելու, և որ արդեն առկա է բազմակողմանի
կոնսենսուս ԵՄ, Թուրքիայի, Իրանի և, բնականաբար, Երևանի ու Բաքվի միջև։
Vesti.am-ը փորձեց հեղինակից պարզել, թե ինչո՞ւ են կոնսենսուսի շրջանակներից
բացակայում Արցախն ու Ռուսաստանը: Չէ՞ որ տարածաշրջանում բոլոր իրադարձությունները
ծավալվում են հենց Արցախի շուրջ, որտեղ 2020 թվականի նոյեմբերի 9-ից տեղակայված են
ռուս խաղաղապահներ, իսկ Հայաստանում կա ռուսական ռազմաբազա:
«Արցախը, ցավոք, սուբյեկտ չէ, Արցախի հետ որևէ մեկը կոնսենսուսի
չի գալու: Արցախի փախարեն որոշումները կայացվում են պաշտոնական
Երևանից և դա բոլոր կողմերին ձեռնտու է: Ճիշտ է, Արցախն ինքնուրույնության նշաններ
է ցույց տալիս, բայց դա դեռևս նրան էական գործոն չի դարձնում:
Ինչ վերաբերվում է Ռուսաստանին, ապա նա կոնսենսուսի մաս չէ, քանի
որ այս սցենարը Թուրքիայի համար շատ լավ հնարավորթյուն է ստեղծում ակտիվանալ Կենտրոնական
Ասիայում: Արդյունքում՝ Թուրքմենական գազի համար նախատեսված Անդրկասպյան գազամուղի
նախագիծը լոբինգ կարվի: Նաև նախատեսվում է նոր գազամուղ ու բարձրավոլտ էլեկտրացանց՝
հենց միջանցքով: Արդյունքում կշահի ԵՄ-ն՝ դիվերսիֆիկացնելով գազի մատակարարումներն
ու նվազեցնելով կախվածությունն ԱՄՆ-ից: Միաժամանակ, այսօր Թուրքիայում ստեղծվող գազատրանսպորտային
հաբից ակտիվորեն օգտվելու է նաև Իրանը՝ դեպի ԵՄ արտահանումն իրականացնելու համար:
Չի բացառում, որ ՌԴ-ն կոնսենսուսի մաս չէ, որովհետև ուղղակի դուրս կմնա տարածաշրջանից՝ Թուրքիայից ստանալով երաշխիքներ, որ բալանսավորված մոտեցում կցուցաբերի
գազային հաբով վառելիքի արտահանման հարցում, այսինքն՝ կապահովի նաև ռուսական գազի արտահանումը:
Ռուսներն առայժմ ստրատեգիական փակուղու մեջ են բոլոր ուղղություններով: Այսինքն Ռուսաստանը
կոնսենսուսի բացահայտ կողմ չէ, բայց այդ կոնսենսուսը նրան պարտադրվում է»,- մեկնաբանեց
Վահե Դավթյանը:
