«Երկիր մեդիա» հեռուստաընկերությունն այլևս հասանելի է միայն կաբելային ցանցում։ Հեռուստատեսության և ռադիոյի հանձնաժողովը 2022 թվականի դեկտեմբերի 2-ին կայացած նիստում որոշեց հանրային մուլտիպլեքսում սլոթի օգտագործման լիցենզավորման հանրապետական սփռման իրավունք տալ 4 հեռուստաընկերության՝ «Արմենիա թի-վի», «Ա-թիվի», «Շանթ», «Մուլտի մեդիա-Կենտրոն թիվի»։ Սակավ միավորների պատճառով լիցենզիա չստացան Հ2 և «Երկիր մեդիա» հեռուստաընկերությունները: Վերջինս դատարան հայց է ներկայացրել ընդդեմ Հեռուստատեսության և ռադիոյի հանձնաժողովի։ Թեմայի վերաբերյալ Vesti.am-ը զրուցել է «Երկիր մեդիա» հեռուսատաընկերության տնօրեն Բագրատ Եսայանի հետ։

-          Պարո՛ն Եսայան, դատարան հայց և միջանկյալ որոշման միջնորդություն էիք ներկայացրել, արդեն որոշում կա՞։

-          Դատարանը որոշել է հայցը վարույթ ընդունել, բայց եթերն անջատելուց ձեռնպահ մնալու միջնորդությունը չի բավարարվել։ Նոր միջնորդություն ենք ներկայացնելու՝ եթերը վերկանգնելու պահանջով։

-          Հեռուսատընկերությանը եթեր չտրամադրելը պայմանավորվա՞ծ է քաղաքական որոշումներով և հեռուստաընկերության ընդդիմադիր գործունեության հետ։

-          Ես, վստահ եմ, որ քաղաքան որոշում է։ Այսօրվա իշխանությունը բազմիցս ցույց է տվել, որ իր բոլոր որոշումները՝ ընտրություններից մինչև վարույթներ հարուցել-չհարուցելու որոշումները, ունեն հստակ քաղաքական ազդակներ։ Օրինակ՝ ընդդիմադիր պատգամավորների նկատմամբ բռնություն գործադրելու դեպքով որևէ քրեական վարույթ հարուցված չէ, բայց դատարան գործ է ուղարկվում ընդդիմադիր պատգամավորներից մեկի ինչ-որ գործողության հետ կապված։ Ընտրական ակնհայտ խախտումներ, որ ՔՊ-ական պատգամավորները բաժանում են (կաշառք խմբ.) քվե ստանալու համար, մնում են անպատիժ, իսկ ընդդիմադիր համայնքապետերին ընտրությունից հետո կալանավորում են։ Մինչև այսօր կալանքի տակ է Մամիկոն Ասլանյանը։ Նույն գործելաոճը վերաբերվում է լրատվամիջոցներին։  Ցանկացած որոշում, որ կայացվում է՝ սկսած իրավապահ համակարգից, վերջացրած լրատվամիջոցներով, ունի քաղաքական դրդապատճառներ։ Ես մի նշույլ անգամ կասկած չունեմ։

-          «Երկիր մեդիա»-ն  այսուհետ հասանելի է միայն կաբելային հարթակներում։ Խոսքը բոլորի մասի՞ն է, թե կան հարթակներ, որ հրաժարվել են հերարձակել։

-          Յուքոմ, Թիմ քոմունիքեյշն, Ռոստելեկոմ հարթակներն իրենց ցանցերով ապահովում են մեր հեռարձակումը, իսկ մնացած 65 կաբելային ցանցերն աստճանաբար միանում են։ Դեռ երկու օր է անցել և շատ ցանցեր մեր հեռարձակումն ապահովել են։ Չկա առնվազն մի կաբելային ցանց, որ հրաժարվել է հեռարձակել «Երկիր մեդիան»։