Ինձ մոտ տպավորություն է, որ բանակցային գործընթացը երբեմն վերածվում է սոսկ վեճի, թե որ կողմի առաջարկված տարբերակը պետք է ընդունվի՝ մոռանալով, թե ինչի մասին է խոսքը, ինչը շատ վտանգավոր է: Այս մասին NEWS.am-ին տված հարցազրույցում նշեց Արցախի ԱԳ նախկին նախարար Կարեն Միրզոյանը:
«Ցավալի է, որ մեր կողմից եւս երբեմն հնչում են հայտարարություններ, որոնք կոպիտ ասած յուղ են լցնում կրակի վրա՝ ասելով, թե մենք ընտրում ենք ռուսական տարբերակը կամ վաշինգտոնյան, կամ արեւմտյան տարբերակը: Փոխանակ խոսվի այդ փաստաթղթերի բովանդակության մասին, թե ինչ է առաջարկվում, քննարկվում է, թե այս կամ այն տարբերակին հավանություն տալով մենք ինչ ենք շահում: Դրանով մենք նպաստում ենք արհեստական բաժանարար գծերի ընդարձակմանը տարածաշրջանում:
Այո, այսօր տարածաշրջանը բավական երկար ընդմիջումից հետո հայտնվել է մեր տերությունների մրցակցության կիզակետերից մեկում եւ դա շատ վտանգավոր է: Պետք է շատ խոհեմ վարվել՝ խուսափելու համար այդ բաժանարար գծերից, կարողանալ պահպանել այնպիսի դիրքորոշում, որը ոչ թե կախված կլինի այս կամ այն տերության նախասիրություններից, այլ քո պետականության շահերից»,-ընդգծեց նա:
