Առողջապահության նախարարությունը պատրաստում է հերթական օպտիմալացումը։ Այս անգամ միավորվում են Այրվածքաբանության ազգային կենտրոնն ու Մաշկաբանության իստիտուտը, որոշ մասն էլ միանում է «Սուրբ Գրիգոր Լուսավորիչ» բժշկական կենտրոնին։ Սակայն սա դեռ վերջնական չէ։ Ասում են՝ նախագիծ է, որը քննարկումների փուլում է։ Նախարարի մամուլի քարտուղար Հռիփսիմե Խաչատրյանից հետաքրքրվեցինք, թե Արյվածքաբանության կենտրոնը ո՞ր ԲԿ-ին է միանում, կամ ո՞ր բաժինը՝ որին, ինչին ի պատասխան Խաչատրյանն ասաց․ «Վերամիավորման մեխանիզմները քննարկման փուլում են։ Նախարարության նման փոփոխությունները միտված են միայն ու միայն մասնագիտական ներուժի համախմբմանը, ուժեղացմանը, զարգացմանը, բայց որ ամենակարևորն է՝ պացիենտի համար է արվում ամեն բան։ Նախ՝ ծառայությունների հասանելիություն, հետո` բուժօգնություն առավել բարձր մակարդակում՝ հաշվի առնելով նաև հիվանդանոցային պայմանները»։ Հետաքրքրական է, որ դեռ նույնիսկ նախագիծ չդարձած միտքը գնահատվում է պացիենտի շահից ելնելով՝ չիմնանալով, թե կենտրոնի ճակատագիրն ի՞նչ է լինելու։ Որքանո՞վ է նպատակահարմար բաժանմունքների տարբեր կենտրոններում տեղակայելը՝ ինչը հաստատեց Այրվածքաբանության կենրոնի մեր աղբյուրը։ Ի՞նչ է լինելու բուժանձնակազմի հետ, նրանց հետ քննարկում եղե՞լ է, թե՞ ոչ և այլն։

Այրվածքաբանության ազգային կենտրոնի փոխտնօրեն Կարինե Բաբայանը Vesti.am-ի հետ զրույցում ասաց, որ աշխատակազմի հետ հանդիպել է փոխնախարարը, տեղյակ է պահել մտադրության մասին, բայց դեռ չգիտեն, թե ի՞նչ է լինելու, ի՞նչ կազմով և ո՞ւր են տեղափոխվելու։ Վստահ է, որ կրճատումներ լինելու են։ «Հրաման դեռ չկա, բայց նախգիծը կա։ Մեզ ասում են, որ ֆինասական խնդիր կա և ճիշտ կլինի, որ միացնեք մեկ այլ կենտրոնի, որ աշխատելն ավելի որակյալ և մատչելի լինի։ Ոչ մի պլան չկա, թե ի՞նչ ժանամակահատվածում ենք գնալու, ինչքա՞ն աշխատողներ են գնալու, ուղղակի կա նման օրակարգ։ Փոխնախարարը հավելյալ տեղեկություններ չի ասել։ Մյուս շաբաթ գնալու ենք նախարարություն և Մաշկաբանության իստիտուտ, գնանք տեսնեք,  նոր խոսենք»,-ասաց Բաբայանն՝ իր խոսքում անդադար հորդորելով դիմել նախարարություն։ Մեր աղբյուրի փոխանցմամբ՝ բուն այրվածքաբանության մասը տեղափոխվելու է Սուրբ Գրիգոր Լուսավորիչ ԲԿ, ամբուլատոր մնացած հատվածը՝ Մաշկաբանության իստիտուտ։ Սա դեռ որոշված չէ, այսօր էլ կենտրոնի տնօրենի, նախարարի և գլխավոր այրվածքաբանի հետ նախարարությունում քննարկում է եղել։ Առաջնային տեղում պացիենտի շահն է լինելու և եթե քննարկումների արդյունքում հասկանան, որ պացիենտը կարող է տուժել, ապա այն կյանքի չի կոչվի։ Բանն այն է, որ երբ մի կենտրոնի համալիր մատուցվող ծառայությունը կիսվում է երկու կլինիկայի մեջ, արդեն իսկ տարակուսանք է առաջացնում։

Նկատենք, որ Այրվածքաբանության ազգային կենտրոնի մի մասնաշենքը դեռ 2019թ-ին վարձակալության տրվեց «Մեդ լայն» ԲԿ-ին։ Այդ գործընթացն անաղմուկ չանցավ և նույնիսկ այն ժամանակ նորանշանակ տնօրեն Գևորգ Սիմոնյանն աշխատակիցներ կրճատեց, եղան վեճեր, նկատողություններ, որոնք հետագայում վիճարկվեցին դատարնում և այլն։ Այն ժամանակ կենտրոնի լաբորատորիայի վարիչ Դավիթ Գրիգորյանին, ով գիտական աստիճան ուներ, առաջարկվեց բանվորի կամ տեխնիկի հաստիք։ Դեռ այն ժամանակ բժիշկ գիտնականը պնդում էր, որ կրճատումները պայմանավորված են «Մեդլայն» ԲԿ-ին տարածք վաճառելով և հետո էլ մնացածն են տալու։ Դավիթ Գիրգորյանը Vesti.am-ին ասաց որ նախարարության որևէ գործողության մեջ վաղուց տրամաբանություն չի փնտրում և բնականաբար այս գործողություններից միայն ու միայն պացիենտն է տուժելու։