Բորելը
հայտարարել է, որ ԵՄ քաղաքացիական դիտորդական առաքելության թիմն արդեն Հայաստանում
է։ Այն տեղակայվելու է 2 ամսով։ Vesti.am-ը
թեմայի վերաբերյալ զրուցել է քաղաքական վերլուծաբան Ստեփան Դանիելյանի հետ։
ԵՄ-ն դիտորդներ կուղարկի հայ-ադրբեջանական
սահման։ Սա կարո՞ղ ենք հայկական կողմի համար դիվանագիտական հաջողություն համարել։
Դիվանագիտական հաջողություննների մասին կարելի
է խոսել, երբ արդեն առկա են արդյունքները։ Կարելի է ենթադրել, որ ՀՀ իշխանությունը,
մտահոգված լինելով ադրբեջանական հարձակումներով, փորձում է միջազգային դիտորդներ ներքաշել՝
միջազգային, հանրային կարծիք ձևավորելու համար։ Հաշվի են առնում նաև այն, որ Ռուսաստանը
հիմա զբաղված է ռուս-ուկրաինական պատերազմով՝ թուլացել է և մեկուսացել աշխարհից։ Այդ
գործիքը ևս փորձում են օգտագործել՝ թե դա որքանով հաջողություն կբերի և որքանով, իրենց
կարծիքով, կմեղմվի սահմանային լարվածությունը: Թե ինչ քաղաքական հետևանքներ կունենա՝ դա
արդեն կտեսնենք ժամանակի ընթացքում։
ՌԴ-ն դեմ է, որ հայ-ադրբեջանական սահմանին ՆԱՏՕ-ի դիտորդներ տեղակայվեն, թեկուզ
անզեն և կարճաժամկետ։ Սա ինչպե՞ս կանդրադառնա հայ-ռուսական հարաբերությունների վրա։
Եթե ՆԱՏՕ-ի դիտորդներ լինեն, դա ոչ միայն ռուսական
հարաբերությունների վրա կանդրադառնա բացասական առումով, այլ շատ ավելի բացասական կանդրադառնա
հայ-իրանական հարաբերությունների վրա։ Որքան հասկանում եմ, տվյալ դեպքում խոսքը ՆԱՏՕ-ի
դիտորդների մասին չէ, այլ՝ ԵՄ-ի քաղաքացիական դիտորդների։
Հնարավո՞ր է, որ իշխանությունը
փորձում է սրանով ՌԴ-ին ստիպել, որ կատարիի իր պարտականությունները։
Ես չեմ կարծում։ Մենք հիշում ենք, որ Զախորովան
հայտարարել է՝ Լավրովի խոսքով, եթե նման միջոցառումները միտված լինեն լարվածության
թուլացմանը, ապա իրենք դեմ չեն լինի։ Եթե խոսքը գնում է լարվածության թուլացման մասին
և ոչ թե աշխարհաքաղաքական վեկտորների փոփոխության, կարծում եմ, որևէ մեկը դեմ չի լինի։
Զախարովայի խոսքով՝ ՌԴ-ն դեմ է, որ ԵՄ առաքելություն տեղակայվի հայ-ադրբեջանական
սահմանին։
Արտահայտություններն ավելի մեղմ են արվել։ ՌԴ-ն
ոչ թե դեմ էր առաքելության տեղակայմանն, այլ՝ մտահոգություններ էր հայտնել և ասել էր՝
քանի որ մոնիթորինգն իրենք են իրականացնում տարածաշրջանում, ուստի իրենք ավելի լավ
են պատկերացնում, թե ինչ է կատարվում։
