Ղրղզստանի, Հայաստանի և Ղազախստանի՝ ՀԱՊԿ համատեղ զորավարժություններից հրաժարվելը չի նշանակում, որ նրանց և Ռուսաստանի միջև տարաձայնություններ կան, այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը:
Նա հայտնել է, որ այս շաբաթ Վլադիմիր Պուտինը կայցելի Աստանա, որտեղ կմասնակցի Ասիայում վստահության միջոցների ամրապնդման համաժողովին և ԱՊՀ գագաթնաժողովին։ Այդ միջոցառումների շրջանակում, նրա խոսքով, Պուտինը նախատեսում է մի քանի երկկողմ հանդիպումներ։
Մասնավորապես, ՌԴ նախագահը կհանդիպի Ղրղզստանի ղեկավար Ժապարովի հետ, ով հրաժարվել է մասնակցել հոկտեմբերի 7-ին կայանալիք ԱՊՀ ոչ պաշտոնական գագաթնաժողովին։
Բացի այդ, ըստ Պեսկովի, հնարավոր է հանդիպում Թուրքիայի նախագահ Ռեջեփ Թայիփ Էրդողանի հետ, ով նույնպես հրավիրված է Աստանա։
«Այս հանդիպմանը անհնար է բացառել «Ռուսաստան-Արևմուտք» ձևաչափով բանակցությունների քննարկումը, որը փորձում է կազմակերպել Էրդողանը», - ասել է Կրեմլի խոսնակը։
