Նախկին գլխավոր դատախազ և քննչական
կոմիտեի նախկին նախագահ Աղվան Հովսեփյանի գործով մյուս մեղադրյալ Վրեժ Մարկոսյանը դատարանի
վճռով մեղավոր է ճանաչվել։ Դատարանի՝ 2022 թվականի օգոստոսի 4-ի որոշմամբ, մայր քրեական
գործից անջատվել էր Մարկոսյանի վերաբերյալ քրեական գործը: Վերջիսն մեղադրվում է այն
բանի համար, որ նա 2017 թվականի ապրիլի
10-ին Աղվան Հովսեփյանի դրդմամբ վատնել է Վարշամ Ղարիբյանի կողմից իրեն վստահված Երևան
քաղաքի Աջափնյակ համայնքի Գ1 թաղամասի թիվ 29/11 հասցեում գտնվող 3,0078 հեկտար մակերեսով
առանձնապես խոշոր չափերով՝ 672.400.000 ՀՀ դրամ արժողությամբ հողամասը: Այն համապատասխան պայմանագրով նվիրաբերելով
Ա. Հովսեփյանի որդուն՝ Արմեն Հովսեփյանին, որի սեփականության իրավունքն այդ հողամասի
նկատմամբ ՀՀ անշարժ գույքի կադաստրի պետական կոմիտեում գրանցվել է նույն թվականի ապրիլի
13-ին:
Վրեժ Մարկոսյանն ընդունել էր իրեն առաջադրված մեղադրանքը՝ նշելով, որ իրեն լիովին
մեղավոր է ճանաչում և համաձայնեցված վարույթ կիրառելու միջնորդություն էր ներկայացրել,
ինչ էլ դատավոր Մնացական Մարտիրոսյանը բավարարել էր։ Համաձայնեցման վարույթի շրջանակում,
տուժողը Վ. Մարկոսյանի նկատմամբ պահանջ չի ներկայացրել:
Նկատի ունենալով, որ ամբաստանյալ
Մարկոսյանը 72 տարեկան է, ինչպես նաև հիմք ընդունելով Քրեական և Քրեական դատավարության
օրենսգրքերի համապատասխան նորմերի դրույթները, համաձայնեցման վարույթի շրջանակում կողմերը
համաձայնվել են ամբաստանյալին մեղսագրվող արարքի համար հետևյալ պատժատեսակի և պատժաչափի
վերաբերյալ՝
• Վ. Մարկոսյանի նկատմամբ որպես պատիժ
նշանակել ազատազրկում՝ 5 տարի 4 ամիս ժամկետով (այս գործով առավելագույն պատժաչափն
է, որ կարող էր նշանակվել համաձայնեցման վարույթի շրջանակում),
• Կիրառել 01.11.2018թ. ընդունված
«Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության
հռչակման 100-ամյակի կապակցությամբ քրեական գործերով համաներում հայտարարելու մասին»
ՀՀ օրենքի 2-րդ հոդվածի 2-րդ մասի 5-րդ կետը և Վ. Մարկոսյանին պատժից ազատել:
Արդյունքում ամբաստանյալը Մարկոսյանը
դատապարտվել է 5 տարի 4 ամիս առավելագույն պատժին, սակայն համաներմամբ պատժից ազատվել
է։
Գործով Աղվան Հովսեփյանի մասը դատավոր
Մարտիրոսյանն ուղղարկել է Հակակոռուպցիոն կոմիտե։ Թեևս Վրեժ Մարկոսյանի մեղադրանքն
ընդունելն առավել դժվար է դարձնում Հովսեփյանի պաշտպանությունը՝ հատկապես այն դեպքում,
երբ գործով շոշափվում է Հովսեփյանի տղայի անունը։
