Ապրիլի 1-ին Ուկրաինան և Միացյալ Նահանգները տեսակոնֆերանսի միջոցով բանակցություններ կանցկացնեն պատերազմի ավարտի վերաբերյալ։
Ինչպես հաղորդում է UNIAN-ը, այս մասին հայտարարել է Ուկրաինայի նախագահ Վլադիմիր Զելենսկին Բուչայի ազատագրման չորրորդ տարեդարձին նվիրված միջոցառման ժամանակ։
«Նրանք խնդրեցին ինձ նույնպես միանալ հանդիպմանը։ Ես երեկ երեկոյան քննարկեցի սա ՆԱՏՕ-ի գլխավոր քարտուղար Մարկ Ռյուտեի հետ։ Մենք համաձայնեցինք, որ նա, ես, Վիտկոֆը, Քուշները, Լինդսի Գրեհեմը և ուրիշներ կլինենք այնտեղ։ Մենք կքննարկենք մեր ներկայիս կարգավիճակը։ Մենք կքննարկենք, թե որքան մոտ ենք եռակողմ համաձայնություններին կամ առնվազն եռակողմ հանդիպմանը։ Հետևաբար, վաղը մենք կունենանք համապատասխան շփումներ», – նշեց նա։
Ուկրաինայի նախագահը ընդգծեց, որ տարածքները մնում են բանակցությունների գլխավոր հարցը։
Նրա խոսքով՝ Ուկրաինայի համար փոխզիջումը շփման գծում պատերազմը դադարեցնելու համաձայնության հասնելն է, մինչդեռ Ռուսաստանը շարունակում է պահանջել ուկրաինական զորքերի դուրսբերումը Դոնեցկի մարզից։
«Նրանք ամերիկացիներին ասում են, որ այժմ նոր վերջնաժամկետ ունեն՝ երկու ամսվա ընթացքում կգրավեն մեր երկրի արևելքը՝ Դոնբասը։ Հետևաբար, Ուկրաինան երկու ամիս ունի հեռանալու համար։ Այդ դեպքում պատերազմը կավարտվի։ Եթե Ուկրաինան չհեռանա, Ռուսաստանը կգրավի Դոնբասը, ապա կդնի նոր պայմաններ։ Տրամաբանական հարց է առաջանում. եթե նրանց միակ նպատակը Դոնբասն է, ապա ինչո՞ւ, այն գրավելուց հետո, նրանք ասում են, որ կշարունակեն առաջ շարժվել։ Այսինքն՝ խոսքը Դոնբասի մասին չէ», – հավելել է Ուկրաինայի առաջնորդը։
