Երեկ Եռաբլուրից ոստիկանության տարբեր բաժիններ են բերման ենթարկվել զոհված զինծառայողների ծնողներ։ Նրանց իրավական աջակցություն ցույց տալու է շտապել փաստաբան Վահան Հովհաննիսյանը, ով նաև ծնողների պաշտպանն է «դավաճանության» հայտնի գործով։

-          Պարո՛ն Հովհաննիսյան, Ոստիկանությունն ինչպե՞ս է պարզաբանել, ինչո՞ւ են ծնողները բերման ենթարկվել։

-          Չեն ենթարկվել ոստիկանության օրինական պահանջին։

-          Իսկ ո՞րն էր այդ օրինական պահանջը։

-          Այդ հարցի պատասխանը ոչ մեկ չգիտի։ Տեսագրությամբ հստակ երևում է, որ մայրերից երեքը նստած են նստարանի վրա, ոստիկանները մոտենում են ու առանց որևէ խոսք ասելու բերման են ենթարկում և նստեցնում են մեքենան։ Ոչ թե իրավական, այլ ընդհանրապես, ոչ  մի պահանջ չի ներկայացվում։

-          Դուք ի՞նչ իրավական գնահատական կտաք ոստիկանության գործողություններին։

-          Իմ կարծիքով ոստիկանության գործողություններում առկա են քրեական օրենսգրքով նախատեսված հանցագործության հատկանիշներ՝ լիազորությունների անցում, դիքի չարաշահում։ Մենք այսօր պետք է ծնողների հետ հանդիպենք,  քննարկենք՝ ներկայացնենք հանագործության մասին հաղորդում։ Մի քանի ժամից պարզ կլինի։

-          Ծառայողական քննություն է սկսվել, սա բավարա՞ր չէ ծնողների համար, թե՞ չեն վստահում անաչառությանը։

-          Եթե նույնիսկ ծառայողական քննության ընթացքում հայտնաբերվեն խախտումներ, ապա անձը դրա համար ենթարկվում է կարգապահական պատասխանատվության։ Մենք ներկայացնելու ենք հանցագործության մասին հաղորդում, քանի որ առերևույթ տեսանելի է, որ խոսքը չի գնում միայն կարգապահական խախտման կամ զանցանքների մասին։ Մեր կարծիքով այդտեղ տեղի է ունեցել հանցագործություն։ Ծնողներից երկուսը ստացել են մարմնական վնասվածքներ։

-          Ոստիկանները բաժնում որևէ կերպ փորձե՞լ են հիմնավորել իրենց արարքը՝ վերադասից ստացած հրաման և այլն։

-          Ո՛չ։ Ես այն տպավորությունը ստացա, որ ոստիկանները բարոյական ենթատեքստում,  առանձնազրույցներում շատ հարցերում համաձայն էին մեզ հետ և ցավում էն, որ ծնողները ներկայացել են ոստիկանության բաժիններ։ Սա ոչ պաշտոնական խոսակցություններում, սակայն պարզ էր, որ ստացել են ցուցում և պետք է կատարեին։

-          Հույս ունե՞ք, որ նման միջադեպն իրավական պատշաճ գնահատական կունենա։

-          Ծնողները խորը հիասթափության մեջ և նրանք գտնում են, որ անգամ հաղորդում ներկայացնելն է ինքնանպատակ։ Նրանց գործողություններում հանցագործության հատկանիշներ կան, բայց արդյոք ծնորղները կցնականան մտնել այդ քաշքշուկի մեջ։ Գիտե՞ք ինչքան են տանում բերում, իրենց վշտի հետ կհամձայնվեն դրան գնալ, հատկապես, երբ առանձնապես մեծ հյուսեր չունեն։

-          Իշխանության ներկայցուցիչների բերած ծաղկեպսակները նետելու համար ծնողները քրեական պատասխանատվության կենթարկվե՞ն։

-          Ես քրեական օրեսգրքում չեմ տեսնում մի հոդված, որով հնարավոր լինի ծնողներին ենթարկել քրեական պատասխանատվության։ Եթե կփորձեն նման վարույթ նախաձեռնել՝ շատ արագ մեր պատասխանը կլսեք։