Արտաքին քաղաքական մարտահրավերները վերջին շրջանում զգալիորեն փոխվել են, եւ դրանք կշարունակեն փոխվել՝ նոր իրողություններ ձեւավորելով։ Ցավոք, օբյեկտիվ եւ սուբյեկտիվ պատճառներով ՀՀ արտաքին գործերի նախարարությունը միշտ չէ, որ կարողացել է լիարժեքորեն համաչափ շարժվել այդ իրողություններին՝ ինչպես կադրային, այնպես էլ բովանդակային առումով։ Այս մասին հունիսի 6-ին Ազգային ժողովում մշտական խորհրդարանական հանձնաժողովների համատեղ նիստին 2021 թ. պետբյուջեի կատարողականի նախնական քննարկման ժամանակ ասաց ՀՀ արտգործնախարար Արարատ Միրզոյանը։
Նախարարը դիվանագիտական պաշտոններում քաղաքական նշանակումների մեջ վտանգավոր ոչինչ չի տեսնում: «Նախարարը քաղաքական պաշտոն է, եւ արտաքին կապերի գերատեսչությունների ոչ բոլոր ղեկավարներն են պրոֆեսիոնալ դիվանագետներ։ Նույնն է նաեւ դեսպանների դեպքում։ Ինչ վերաբերում է դեսպանների վերջին քաղաքական նշանակումներին, ապա կարող եմ վստահեցնել, որ նրանք մեր լավագույն դիվանագետներից են»,- հավաստիացրեց Միրզոյանը։
