ՀՀ գյուղատնտեսության նախարար Արթուր Խաչատրյանն այսօր խաղողագործների հետ հանդիպումից հետո լրագրողների հետ ճեպազրույցում հույս հայտնեց, որ կկարողանան այնպես անել, որ խաղողը մթերվի խելամիտ գներով:
«Երեկ մթերման սեզոնից առաջ ավանդական քննարկում է եղել բոլոր խաղող մթերողների հետ: Հանդիպմանը հույս ենք հայտնել, որ խաղողը կմթերվի խելամիտ գնով, կմթերվի խելամիտ քանակով, իսկ վճարումներն ակնկալում ենք, որ ժամանակին կլինեն՝ ամենաուշը դեկտեմբերի վերջին»,-ասաց գյուղնախարարը՝ հավելելով, որ հանդիպումներ կլինեն կոնյակ արտադրող գործարաններից մի քանիսի հետ, քննարկումներ կծավալվեն նաև կառավարությունում:
Նախարարը մանրամասնեց, որ երեկ ներկայացվել է կառավարության քայլերի մասին, մասնավորապես, խոսել են օրենսդրական փոփոխությունների մասին, որով տեղական արտադրողի և ներկրողի միջև սկսվում են հավասար պայմաններ:
«Մինչև այս տարվա հունիս ամիսը, որքան էլ դա պարադոքսալ թվա՝ կոնյակ և կոնյակի սպիրտ արտադրելը ծանուցման ենթակա գործունեություն էր: Օրինակ՝ մարդիկ պետք է 15 մլն վճարեին և ասեին, որ մենք զբաղվելու ենք կոնյակ և կոնյակի սպիրտ արտադրելով, իսկ կոնյակ բերելն արդեն ծանուցման ենթակա չէր, այսինքն՝ բերողն ու արտադրողը անհավասար պայմանների մեջ էին: Նախ՝ խաղողի կոնյակի մինիմալ գինն ենք ֆիքսել, որովհետև եթե վաճառվում է կոնյակ 1000 դրամով, ինձնից ձեզ խորհուրդ՝ մի՛ խմեք այդ կոնյակը»,- ասաց նախարարը՝ հավելելով, որ քննարկվել են նաև այլ հարցեր:
Vesti.am
