«Այսօր կառավարությունում հաստատեցինք 2017 թվականի բյուջեի կատարողականը՝ իր բոլոր հավելվածներով և մայիսի 1-ին այն օրենքով սահմանված կարգով կմտնի Ազգային ժողով»,- կառավարության նիստից հետո լրագրողների հետ ճեպազրույցում ասաց Ֆինանսների նախարարի պաշտոնակատար Վարդան Արամյանը:
«Մենք բյուջեի կատարողականը ներկայացնելիս հանրությանը խոստանում էինք հարկաբյուջետային այնպիսի քաղաքականություն իրականացնել, որ մակրոտնտեսական իրավիճակի կայունացում լինի: 2016 թվականին տեղյակ եք, որ պարտք/ՀՆԱ ցուցանիշն օբյեկտիվ պատճառներով բավականին աճ էր գրանցել: Իսկ դա նշանակում էր, որ առաջին հերթին պետք է հարկաբյուջետային քաղաքականություն իրականացնել և 2017 թվականին պարտքի կայունություն լիներ»,- նկատեց Արամյանը՝ հավելելով, որ իրենց, կարծես, հաջողվել է այդ թիրախը խոցել:
Նրա խոսքով՝ 2017 թվականի հարկաբյուջետային քաղաքականության իրականացման արդյունքում պարտք/ՀՆԱ աճի տեմպերն էապես դանդաղել են, ինչպես որ խոստացել էին:
«2018 թվականին էլ խոստանում ենք, որ եթե ամեն ինչ ընթանա իր հունով և մենք խոցենք այն թիրախները, որոնք դրվել են 2018 թվականի բյուջեի հենքում, մենք արդեն կունենանք պարտք/ՀՆԱ ցուցանիշի նվազում՝ առնվազն 1 տոկոսային կետով:
Vesti.am
