Արցախի և Հայաստանի  միջև առկա  ռազմական համագործակցության շրջանակներում «Առկա ուժերով և միջոցներով հարձակողկան օպերացիայի նախապատրաստումն ու վարումը: Նպաստավոր բնագծերի զբաղեցումը և պաշտանության կազմակերպումը» թեմայով Արցախում անցկացվեց Հայաստանի և Արցախի զինված ուժերի միացյալ զորավարժություններ:

Զորավարժություններին մասնակցում էին Արցախի Հանրապետության նախագահ Բակո Սահակյանը, Արցախի Հանրապետության պաշտպանության նախարար Լևոն Մնացականյանը, Հայաստանի Հանրապետության նախագահ Սերժ Սարգսյանը և ՀՀ պաշտպանության նախարար Վիգեն Սարգսյանը:  Զորավարժությունների ժամանակ մշակվել են հատկապես հարձակողական գործողություններ:

Միացյալ զորախմբի հրամանատար Տիգրան Փարվանյանը լրագրողների հետ զրույցում ասաց, որ զորավարժության ընթացքում ստուգվեց զորամասերի և ստորաբաժանումների մարտական պատրաստվածության մակարդակը, ինչպես նաև կկատարելագործվեն դրանց մարտական ունակությունները:

«Համաձայն Հայաստանի Հանրապետության և Արցախի Հանրապետության միջև առկա ռազմական համագործակցության, ինչպես նաև փոխադարձ օգնության շրջանակներում երկու երկրների զինված ուժերի ստորաբաժանումների գործողությունների ներդաշնակում է լինելու: Մեր հիմնական նպատակը հենց դա էր, որ համահավաք զորախումբը ներդաշնակեցվի, որպեսզի կարողանան միասին գործել, միասին խնդիրներ կատարել անհրաժեշտության դեպքում միասին մարտ վարել»,- նշեց զորախմբի հրամանատարը:

Փարվանյանը շեշտեց, որ զորավարժությունը լայնամասշատաբության առումով նախադեպ չի ունեցել. զորավարժություններին ներգրավված էր մի քանի հարյուր անուն տեխնիկա թե՛ ցամաքային, թե՛  օդային զորատեսակներից և հազարավոր զինծառայողներ:

«Պայմանական իրավիճակը հետևյալն էր՝ հակառակորդը պայմանականորեն ճեղքել է մեր առաջնագիծը: Մեր զորախումբը խնդիր ուներ կանգնեցնելու հակառակորդին, ստիպելու անցնել հապճեպ պաշտպանության, և ճեղքելով հակառակորդի պաշտպանությունը, մասնատելու, և մաս առ մաս ջախջախելու իր իսկ զբաղեցրած շրջանում»,- հստակեցրեց Փարվանյանը:

Զորավարժությունների ավարտից հետո լրագողների  հետ զրույցում գնահատելով զորավարժությունները՝ ՀՀ ԶՈւ գլխավոր շտաբի պետ Մովսես Հակոբյանն ասաց, որ արդյունքները բավարար են ու գոհացուցիչ:

«Հակառակորդին միայն պաշտպանությունով չես կարող ամբողջությամբ ջախջախել, այն հակառակորդը, որը կփորձի հատել Արցախի Հանրապետության կամ Հայաստանի Հանրապետության սահմանը, ապա այս խմբավորումը նախատեսված է նրա համար, որպեսզի մխրճված հակառակորդի վրա հարձակվի, մասնատի։ Կոնկրետ այս զորավարժության ժամանակ մտահաղացումն այդպիսին է եղել՝ ամբողջությամբ ջախջախել»,- շեշտեց Հակոբյանը՝ նշելով, որ տեխնիկան մարտունակ վիճակում է, անձնակազմը պատրաստ էկրակ վարելու համար, հրամանատարները կարողանում են արագ որոշումներ կայացնել ու իրենց որոշումները իրականությունդարձնել:

«Արդյունքները կամփոփենք, երբ որ ողջ տեխնիկան վերադառնա զորամասի մշտական տեղակայման վայր, մենք կհաշվենք կրակային խոցման արդյունքները, ղեկավար կազմի կայացրած որոշումները, այնուհետև կտանք գնահատական, բայց, ընդհանուր, այն, ինչ որ դինամիկայով տեսել ենք, մտահաղացումը շատ լավ էր»,- ասաց Մովսես Հակոբյանը։

ՀՀ ԶՈւ գլխավոր շտաբի պետի խոսքով՝ Զինված ուժերի ռազմավարական դոկտրինան պաշտպանողական է, բայց պաշտպանողական օպերացիան իր մեջ ներառում է պաշտպանողական, հարձակողական ու հակահարձակողական օպերացիա։

ՀՀ Զինված ուժերի գլխավոր շտաբի պետն ասաց, որ Արցախին ու Հայաստանին լավ պատրաստված զինվորներ պետք են, բայցգերագույն խնդիրը ներդաշնակ ստորաբաժանում ունենալն է։

 «Եթե ունես բանակ, ապա դա պետք է մարզել և շատ կարևոր է, որ մեր հակառակորդը լինի արժանի հակառակորդ, որպեսզի մենք հաղթենք արժանի հակառակորդին»,- նշեց Մ.Հակոբյանը։

Vesti.am

Լուսանկարները՝ Աստղիկ Հովհաննիսյանի