ԱԺ-ում 2018 թվականի բյուջեի նախագծի քննարկումներին ԱԺ խմբակցությունների անունից հնչեցին ելույթներ, ըստ որոնց՝ կողմ կքվեարկեն կոալիցիոն գործընկերները՝ «Հայաստանի Հանրապետական կուսակցությունը» և «Հայ Յեղափոխական Դաշնակցությունը» և դեմ՝ «Ծառուկյան» և «Ելք» խմբակցությունները։
ՀՅԴ անունից ելույթ ունեցավ ԱԺ ՀՅԴ խմբակցության քարտուղար Աղվան Վարդանյանը, ով վստահ է, որ առաջարկվող բյուջեն նման բարեփոխումների հիմք ստեղծում է:
«Մեր կարծիքով, որդեգրված՝ տնտեսական զարգացման հիմքեր ստեղծելու քաղաքականությունը, դրա արտահայտությունն է այս բյուջեն, այդ հեռանկարի իրատեսական առաջին քայլերից է: Բնականաբար, ՀՅԴ խմբակցությունը կողմ է քվեարկելու մեր կառավարության ներկայացրած բյուջեին»,-եզրափակեց նա:
«Ծառուկյան» խմբակցության անունից ելույթ ունեցավ ԱԺ փոխխոսնակ Միքայել Մելքումյանը և հայտարարեց, որ մեր երկրում սոցիալական բևեռացումը մեծ է, տնտեսական վիճակը՝ վատ:
«Հիմա, հարգարժան կառավարություն, ուզում եք այս պայմաններում դասական ճշմարտությո՞ւն իրականացնել։ Չեք կարողանում հիվանդին ճիշտ բնորոշում տալ և դասագրքային լուծում եք առաջարկում»,-ասաց նա:
ՀՀԿ խմբակցության անունից խոսեց խմբակցության ղեկավար Վահրամ Բաղդասարյանը և նշեց, որ բյուջեի նախագիծն ուղղված է ստվերի կրճատմանը, գործարար միջավայրի հավասարության ապահովմանը:
«Համոզված եմ, որ բյուջեում արտացոլված ցուցանիշները բխում են ՀՀ կառավարության, ՀՀԿ-ի ծրագրից, իրատեսական են, ոչ մի թիվ շինծու չէ, և հիմքեր պետք է ստեղծենք հաջորդ տարիներին տնտեսական վիճակը բարելավելու համար»,-ասաց նա:
Vesti.am
