Երկրպագուների 40 հոգանոց խումբը դեռ Հայաստան չի վերադարձել։ FAF ակումբի առաջնորդ Սերգեյ Ջանջոյանը «Ազատության»-ը փոխանցել է, որ հարձակումը տեղի է ունեցել շատ անսպասելի՝ մարզադաշտից հեռանալու ընթացքում։

«Տղաներ, երեխաներ, աղջիկներ... շարժվում ենք խառը, մեկը ընկերոջ հետ է զրուցում, մյուսը՝ երեխային գրկած, հարձակումը տեղի ունեցավ, դրոշը վերցրեցին առաջին անգամ, ծաղրի տեսքով, բարձր պարզելով, ոգևորված ինչ-որ շարժումներ արեցին, որից հետո՝ հայհոյանքների տարափ, վանկարկումներ։ Դրոշը վերցնելուց հետո բառաբանով [թմբուկով] հարված ստացան, ու բախումը տեղի ունեցավ», - ասել է Ջանջոյանը։

Հոսպիտալացված երկրպագուն արդեն դուրս է գրվել, իսկ բերման ենթարկվածին ոստիկանները կարճ ժամանակ անց ազատ են արձակել։

Միջադեպն, ըստ FAF-ի, տեղի է ունեցել մարզիչների ասուլիսի ընթացքում, հայկական և տեղական լրատվամիջոցները ներկա չեն եղել։

Ըստ Ջանջոյանի՝ խաղի ընթացքում տրիբունայում լարվածություն չի եղել, սակայն հանդիպումից հետո հայտարարվել է, որ հայ երկրպագուները մարզադաշտից պետք է դուրս գան 30 րոպե ուշ։

«Մեզ պահեցին ավելի երկար՝ 35-ից 40 րոպե, որից հետո արդեն ամբողջովին մաքրած էր գլխավոր փողոցը, որով պետք է շարժվեինք դեպի մեր ավտոբուս, այդ ընթացքում հարձակումը տեղի ունեցավ։ Նրանք պատրաստ էին, որ ինչ-որ բան լինելու է, նրանք սպասում էին։ Բախումը 5-ից 6 րոպե տևեց, որից հետո ոստիկանությունը ոչ թե կողմերին բաժանեց, այլ երկու կողմին էլ հարվածներով հեռացրեց», - պատմել է FAF ակումբի առաջնորդը։

Հայ երկրպագուներից որևէ մեկը Չեռնոգորիայի ոստիկանություն այսօր չի կանչվել։

Հայաստանի արտգործնախարարությունն արդեն պարզաբանումներ է պահանջել Չեռնոգորիայի իշխանություններից։ Նախարարության խոսնակ Տիգրան Բալայանի փոխանցմամբ, Պոդգորիցայից վստահեցրել են, որ մեղավորները պատժվելու են։

«Չեռնոգորիայի իշխանությունների կողմից տրամադրված պաշտոնական տեղեկությունների համաձայն, տեղի է ունեցել միջադեպ երկու Չեռնոգորիայի քաղաքացի անչափահասների միջև և Հայաստանի երկու քաղաքացիների միջև՝ մեկ կնոջ և տղամարդու, տղամարդու աչքի մի մասը վնասված է եղել, անմիջապես ցուցաբերվել է բուժօգնություն, որևիցե բողոք անչափահասների դեմ չի ներկայացվել, ամեն դեպքում՝ Չեռնոգորիայի օրենսդրությամբ նախատեսվում է, որ այդ անչափահասները կենթարկվեն վարչական պատասխանատվության», - «Ազատության»-ը ասել է Բալայանը։

Նախարարության խոսնակը վստահեցնում է, որ արտգործնախարարությունը շարունակում է ուշադրությամբ հետևել զարգացումներին, կապի մեջ է տեղի իշխանությունների հետ և անհրաժեշտության դեպքում աջակցություն կցուցաբերի առայժմ Հայաստան չվերադարձած երկրպագուներին։

Մանրամասները՝ «Ազատություն»-ում: