Վերջին շրջանում՝ հատկապես ռուս-ամերիկյան հրադադարի հաստատման վերաբերյալ հայտարարությունից հետո, Սիրիայի շուրջ ռազմաքաղաքական նոր իրողություն ստեղծվեց: Սեպտեմբերի 13-ին լրագրողների հետ հանդիպմանը նման տեսակետ է հայտնել իրանագետ Կարեն Մկրտչյանը:

Ըստ բանախոսի՝ այդ փաստաթուղթը Թուրքիայի ռազմական գործողությունները դեպի Սիրիա կասեցնելու նշանակություն ունի, ավելին՝ այն զսպաշապիկի դեր ունի:

Մկրտչյանի կարծիքով՝ այդ կարևոր փաստաթղթի ստորագրումից հետո իրանական կողմն այն ողջունեց՝ միաժամանակ իր մտահոգությունը հայտնելով այն հարցի շուրջ, որ բոլոր հրադադարների հաստատումը չէ, որ տանում է դեպի հաշտեցում: Բացի այդ, իրանական կողմն ընդգծել էր, որ հրադադարի հաստատումը չպետք է չարաշահվի տարածաշրջանում՝ մասնավորապես Սիրիայում զինված ուժերի և զինտեխնիկայի նոր տեղաշարժերի կատարմամբ:

-Իրանական կողմը յուրօրինակ կերպով կրկին փորձում է Անկարային  հասկացնել, որ զենքի մատակարարումը սիրիական ահաբեկչական խմբերին՝ տվյալ դեպքում ԻՊ-ին և  նրանց կից նոր ահաբեկչական կազմավորումներին անթույլատրելի է և այդ ամենը պետք է բխի միջազգային այս փաստաթղթից,- ասել է բանախոսը՝  ընդգծելով, որ այդ փաստաթուղթը, որ ստորագրվել է երկու ռազմաքաղաքական հզոր պետությունների կողմից, ավելի ծանրակշիռ նշանակություն ունի և հեռանկարի առումով տարածաշրջանում խաղաղության որոշակի հիմքեր ստեղծելու հույսեր է ներշնչում:

Vesti.am