Վրաստանն ու Ադրբեջանը քննարկել են տարածաշրջանային էներգետիկ անվտանգության ամրապնդումն ու «Կանաչ էներգետիկ միջանցք» նախագծի առաջմղումը, որը նախատեսում է Հարավային Կովկասից Եվրոպա էլեկտրաէներգիայի մատակարարում, հայտնում է «Նովոստի Գրուզիա»-ն։
Բանակցությունները տեղի են ունեցել Բաքվում՝ Վրաստանի փոխվարչապետ, էկոնոմիկայի և կայուն զարգացման նախարար Մարիամ Կվրիվիշվիլիի և Ադրբեջանի էներգետիկայի նախարար Փարվիզ Շահբազովի միջև։
Հանդիպման գլխավոր թեմաներից մեկն Ադրբեջանի, Վրաստանի, Ռումինիայի և Հունգարիայի մասնակցությամբ նախագիծն էր, որը նախատեսում է Սև ծովի հատակով 4000 ՄՎտ հզորությամբ էլեկտրական մալուխի անցկացում։ Կողմերը քննարկել են նաև երկու երկրների էներգահամակարգերի զուգահեռ աշխատանքի, էլեկտրաէներգիայի փոխադարձ մատակարարումների, ածխաջրածինների տարանցման և Վրաստանում ադրբեջանական պետական նավթային SOCAR ընկերության գործունեության հարցերը։
Ըստ Շահբազովի՝ վերջերս ստորագրված երկկողմ համաձայնագրերը պետք է լրացուցիչ խթան հաղորդեն Բաքվի և Թբիլիսիի էներգետիկ համագործակցությանը։ Նա նշել է, որ երկու երկրների գործընկերությունը կարևորություն է ձեռք բերում ոչ միայն Հարավային Կովկասի, այլև Եվրամիության հետ էներգետիկ փոխկապակցվածության համար։
Մեկ օր առաջ՝ նոյեմբերի 17-ին, Ադրբեջանի նախագահ Իլհամ Ալիևն ընդունել էր Կվրիվիշվիլիին։ Հանդիպմանը քննարկվել են երկկողմ ապրանքաշրջանառության ավելացման, ներդրումների և համատեղ տրանսպորտային ու տարանցիկ միջանցքների զարգացման հարցերը։
Ադրբեջանը շարունակում է մնալ Վրաստանի էներգառեսուրսների հիմնական մատակարարներից մեկը։ 2026 թվականի հունվար–սեպտեմբերին Թբիլիսին Բաքվից գնել է 171 միլիոն կՎտ·ժ էլեկտրաէներգիա՝ ավելի քան 41 միլիոն դոլար արժողությամբ։ Ադրբեջանական գազն ապահովում է Վրաստանի սպառման ավելի քան 70%-ը։ 2025 թվականի արդյունքներով՝ երկիրն Ադրբեջանից ստացել է 2,27 միլիարդ խորանարդ մետր գազ՝ նախորդ տարվա համեմատ 1,6%-ով պակաս՝ ռուսական գազի գնումների ավելացման ֆոնին։









