Առողջապահության համաշխարհային կազմակերպության (ԱՀԿ) տվյալներով՝ սեպտեմբերին հակամարտության սրումից ի վեր Եմենում զոհերի թիվը հասել է 1677-ի, իսկ վիրավորներինը՝ 7395-ի։ «Արմենպրես»-ի փոխանցմամբ՝ այս մասին հաղորդում է Al Jazeera-ն։

Նշվում է, որ Մարիբը պատերազմից ամենաշատ տուժած նահանգն է, որին հաջորդում են Թաիզն ու Լահջը։

Կազմակերպությունը զգուշացրել է, որ Մարիբում գործող 31 շարժական բժշկական խմբերից մնացել են միայն 6-ը։

ԱՀԿ-ն նաև հայտնել է, որ մարտական ​​գործողությունների վերսկսումից ի վեր 276 301 մարդ ստիպված է եղել լքել իր բնակավայրը։

Կազմակերպությունը զգուշացրել է, որ կենսական նշանակություն ունեցող ծառայությունների շարունակական խափանումները, դեղորայքի, վառելիքի և ջրի պակասը, ինչպես նաև թափոնների կառավարման անբավարար համակարգը մեծացնում են վարակիչ հիվանդությունների բռնկման վտանգը, հատկապես՝ Թաիզում։

Եմենում պատերազմ է ընթանում 2014 թ. սեպտեմբերից, երբ հութիները գրավեցին մայրաքաղաք Սանան և մի քանի այլ նահանգ։ 2015 թ. մարտին Սաուդյան Արաբիայի գլխավորած արաբական կոալիցիան միջամտեց հակամարտությանն՝ աջակցելով Եմենի՝ միջազգայնորեն ճանաչված կառավարությանը։

Սեպտեմբերից հակամարտող կողմերը շարունակ հարվածներ են հասցնում մեկը մյուսին։