Մտածելակերպի և գաղափարի փոփոխություն տեղի ունեցավ ինձ մոտ: Երկար ժամանակ լինելով ընդդիմադիր դաշտում, տեսնելով այնտեղի գործունեությունը՝ իմ մեջ շատ բաներ վերլուծեցի և հասկացա: Որոշեցի, որ պետք է կանգանեմ այն օրակարգի կողքին, որը թելադրում է այսօր իշխանությունը, պետք է կանգնեմ խաղաղության կողքին: Այս մասին «Քաղաքացիական պայմանագիր» կուսակցության քարոզարշավի ժամանակ, Armlur.am-ի հետ զրույցում ասել է երգիչ Մհեր Արմենիան:
Նա նշել է, որ ընդդիմադիր դաշտում կան մարդիկ, որոնք իսկապես հայրենասեր են, բայց կան նաև մարդիկ, որոնք ավելի շատ իրենց հարցերով են զբաղված, քան ժողովրդի:
«Ինձ համար առաջնայինն այն թեզն է, որ կա խաղաղության օրակարգը, դա ամենակարևորն է։ Այն օրակարգը, որ այսօր իշխանությունը՝ վարչապետի գլխավորությամբ, տանում է առաջ, խաղաղությունն է և այդ խաղաղությունը մենք պետք է ամեն ինչ անենք, որ պահենք։
Մենք շատ դժվարություններ ենք տեսել: Բոլորս կուզեինք, որ Արցախը մերը լիներ, ես չեմ կարծում՝ կա մարդ, որը չէր ուզենա, բայց այսօր պետք է կարողանանք ինչքան հնարավոր է պահել այդ խաղաղությունը:
Արցախցի ընկերներ ունեմ, իրենց համար էլ է դժվար, ինչքան շատ դժվարություններ տեսանք: Ինձ համար միշտ էլ Արցախը եղել է և կմնա հայկական: Ամեն մարդ ունի իր կարծիքը, դրա համար ես կարող եմ ասել, որ մենք պետք է ամեն ինչ անենք, խաղաղության օրակարգը առաջ տանենք: Ոչ մեկ չի մոռանում մեր Արցախը, ոչ մեկ չի մոռանում մեր ապրածը»,-ասել է Մհեր Արմենիան:
Նա հավելել է, որ ժողովուրդը սիրում է վարչապետին, սերն է փրկելու աշխարհը և չարությունը չի հաղթի երբեք:
