Ընտրություններից առաջ իշխանությունները ևս մեկ համակարգային բարեփոխում են նախատեսում․ այս անգամ՝ ոստիկանների համար
Ոստիկանության ծառայողների կողմից բնակարան կամ բնակելի տուն ձեռք բերելու կամ բնակելի տուն կառուցելու նպատակով մատչելի և արտոնյալ պայմաններով երկարաժամկետ հիփոթեքային վարկավորման պետական նպատակային ծրագրերից օգտվելու հնարավորություն կտրվի․ կառավարության ապրիլի 18-ի օրակարգում է ներառված հարցը։
«Ոստիկանության մասին» օրենքում փոփոխություն կատարելու մասին» օրենքի նախագծին հավանություն տալու և անհետաձգելի համարելու մասին նախագիծը հեղինակել է ՆԳ նախարար Արփինե Սարգսյանը։
Հիմնավորման համաձայն՝ այս կարգավորման նպատակը և բնույթը հետևյալն է․ «․․․բարձրացնել ոստիկանությունում ծառայության գրավչությունը և ապահովել ոստիկանության ծառայողների սոցիալական լրացուցիչ երաշխիքներ»։
Նախագծի ընդունմամբ առաջարկվում է «Ոստիկանության մասին» օրենքի 39-րդ հոդվածում նախատեսել, որ ոստիկանության ծառայողները կարող են բնակարան կամ բնակելի տուն ձեռք բերելու կամ բնակելի տուն կառուցելու նպատակով օգտվել մատչելի և արտոնյալ պայմաններով երկարաժամկետ հիփոթեքային վարկավորման պետական նպատակային ծրագրերից:
Միաժամանակ, ՀՀ կառավարությունը կլիազորվի՝ սահմանելու համապատասխան պետական նպատակային ծրագրերից օգտվելու կարգը և պայմանները»։
Ինչ խոսք, որոշումը կարևոր է, սակայն թե ինչո՞ւ հիմա՝ նախընտրական շրջանում այն կայացնելու անհրաժեշտություն առաջացավ․ արդյո՞ք սա հերթական ավանսն է ոստիկաններին, որ ավելի անձնվեր աշխատեն ոստիկանապետություն դարձած երկրում։
