Իրանում վերջին 10 օրերի բողոքի ցույցերի ընթացքում զոհվել է առնվազն 36 մարդ, հայտնել է մարդու իրավունքների պաշտպանության խումբը։ «Արմենպրես»-ն այս մասին տեղեկանում է BBC-ից։

Նշվում է, որ արտասահմանում գործող «Մարդու իրավունքների ակտիվիստներ» լրատվական գործակալությունը (HRANA) հայտնել է, որ հաստատված զոհերից 34-ը ցուցարարներ են, իսկ երկուսը կապ ունեն անվտանգության ուժերի հետ։

Իրանի իշխանությունները զոհերի պաշտոնական թիվը չեն հրապարակել, սակայն հայտնել են, որ զոհվել է անվտանգության երեք աշխատակից։ BBC Persian-ը մինչ այժմ հաստատել է 20 զոհի մասին տվյալներ և նրանց ինքնությունը։

HRANA-ն նաև հայտնել է, որ տնտեսական ճգնաժամի պատճառով սկսված և 31 նահանգներից 27-ում տարածված անկարգությունների ժամանակ վիրավորվել է ավելի քան 60 ցուցարար, 2076-ը՝ ձերբակալվել։

Հունվարի 6-ի երեկոյան իրանական լրատվամիջոցները հաղորդել են, որ արևմտյան Իլամի նահանգի Մալեքշահիի շրջանում, որտեղ վերջին օրերին տեղի են ունեցել լայնածավալ բողոքի ցույցեր և բախումներ, ոստիկան է սպանվել։

BBC-ն նշում է, որ ավելի վաղ անվտանգության ուժերն արցունքաբեր գազ են կիրառել Թեհրանի Մեծ շուկայում հավաքված ցուցարարների դեմ։

Բողոքի ցույցերը սկսվել են դեկտեմբերի 28-ին, երբ խանութպանները դուրս են եկել մայրաքաղաքի փողոցներ՝ արտահայտելու իրենց զայրույթը ԱՄՆ դոլարի նկատմամբ իրանական ռիալի փոխարժեքի կտրուկ անկման դեմ։ Շուտով ցուցարարներին են միացել նաև ուսանողները, և բողոքի ակցիաները տարածվել են տարբեր քաղաքներում։

Իրանի իշխանությունները հայտարարել են, որ ցուցարարների պահանջներն ընդունելի են. նրանք հայտնել են տնտեսական նոր միջոցառումներ ձեռնարկելու մասին:

Ավելի վաղ ԱՄՆ նախագահ Դոնալդ Թրամփը հայտարարել էր, որ Վաշինգտոնն ուշադիր հետևում է Իրանում զարգացումներին և խստորեն կարձագանքի, եթե իրանցի ցուցարարների նկատմամբ ուժ կիրառվի: Նա նաև նշել էր, որ ԱՄՆ-ն կգնա իրանցիներին օգնության, եթե խաղաղ ցուցարարներ սպանվեն:

Իրանում խոստացել են կոշտ արձագանքել երկրի ներքին գործերին միջամտությանը