Մարդու իրավունքների շուրջ երկխոսության ձևաչափով հանդիպման՝ անհիմն պատճառով հետաձգումը տպավորություն է ստեղծում, թե Բրյուսելը չունի Թբիլիսիի փաստարկված դիրքորոշումը լսելու անկեղծ ցանկության, ասվում է Վրաստանի արտաքին գործերի նախարարության հաղորդագրության մեջ։ Այդ մասին «Արմենպրես»-ը տեղեկանում է Sputnik գործակալության վրացական ծառայությունից:
2025 թվականի նոյեմբերի 21-ին Բրյուսելում նախատեսված հանդիպումը Եվրամիության որոշմամբ հետաձգվել է դրա անցկացումից ընդամենը մի քանի օր առաջ։ Արտաքին գործերի նախարարությունում նշել են, որ վրացական կողմը միջոցառումը դիտարկում էր որպես հնարավորություն՝ ԵՄ-ի հետ քննարկելու այն հարցերը, որոնց վերաբերյալ հաճախ է քննադատություն հնչում Բրյուսելի կողմից։
Գերատեսչությունում ընդգծել են, որ վրացական կողմը կատարել է զգալի նախապատրաստական աշխատանք՝ օրակարգի հարցերի վերաբերյալ ԵՄ-ին ամբողջական և ժամանակին տեղեկատվություն տրամադրելու համար։ Հաշվի առնելով այդ պահանջները՝ պատվիրակության կազմի մեջ էին մտել համապատասխան գերատեսչությունների ներկայացուցիչներ։
Ըստ հաղորդագրության՝ վրացական կողմը հանձնառու է կառուցողական մոտեցմանը և կարծում է, որ գործընկերների հետ հարաբերություններում երկխոսությունն այլընտրանք չունի:
Վրաստանի և Եվրամիության միջև հարաբերությունները զգալիորեն վատթարացել են 2024 թվականի հոկտեմբերին Վրաստանում խորհրդարանական ընտրություններից հետո. հաղթանակից հետո իշխող «Վրացական երազանք» կուսակցությունը հայտարարեց մինչև 2028 թվականը Եվրամիությանն անդամակցելու շուրջ բանակցությունները կասեցնելու մասին:
