Արման Բաբաջանյան անունով անձը մի վիճահարույց հայտարարություն է արել, թե ԱՄՆ կենտրոնական հետախուզական վարչությունը՝ ԿՀՎ-ն (ЦРУ), և Մեծ Բրիտանիայի գաղտնի հետախուզական ծառայությունը՝ Mi 6-ը, աջակցել են Հայաստանին՝ ՆՈՐ հակահետախուզական ծառայություն ստեղծելու գործում:
Ուշադրություն, խոսքը ոչ թե նոր որակի կամ նոր տեխնիկական հագեցվածությամբ
ծառայության մասին է, այլ հենց ՆՈՐ ծառայության:
Նորը ենթադրում է եղածից (եղածներից) առանձին, այլ գործառույթներով, այլ անձնակազմով
և նույնիսկ այլ գործիքակազմով:
Ի գիտություն. Հայաստանի Հանրապետության ԱԱԾ համակարգում
1992 թվականից գործում է հակահետախուզության լխավոր վարչությունը, որն իր գործառույթները կազմակերպում է ՀՀ օրենսդրությամբ չարգելված բացահայտ և գաղտնի մեթոդների ու միջոցների կիրառմամբ՝
առաջնորդվելով ՀՀ Սահմանադրությամբ, «Ազգային անվտանգության մարմիններում ծառայության
մասին», «Օպերատիվ-հետախուզական գործունեության մասին» և մի շարք այլ օրենքներով ու
գերատեսչական նորմատիվ ակտերով: Ավելին, այդ ծառայությունն ազգային անվտանգության մարմինների իրավասության
շրջանակներում իրականացվող գործառույթների համակարգ է, որն ուղղված է օտարերկրյա պետությունների հատուկ ծառայությունների
և այլ կազմակերպությունների, ինչպես նաև առանձին անձանց հետախուզական գործունեության բացահայտմանը, կանխմանը
և խափանմանը:
Հիմա մեզ հարց տանք. ի՞նչ գործառույթ է իրականացնում երկու օտարերկրյա
գաղտնի ծառայությունների աջակցությամբ ստեղծված ՆՈՐ հակահետախուզական ծառայությունը, եթե նրա գործառույթների շրջանակներում
չեն ներառվելու առնվազն ամերիկյան և բրիտանական հատուկ ծառայությունների հետախուզական
գործողությունների բացահայտումը, կանխումը և խափանումը: Իսկ հետաքրքիր չէ՞, թե ո՞ւմ
դեմ է աշխատելու ամերիկաբրիտանական «շարժիչով» հայկական ՆՈՐ հակահետախուզությունը: Մեր
տարածաշրջանում երկու պետություն կա, որոնք գտնվում են ԱՄՆ-ի և Մեծ Բրիտանիայի հետախուզությունների
ուշադրության կենտրոնում՝ Ռուսաստանը և Իրանը: Չի բացառվում, որ վերջին քաղաքական իրադարձություններից
հետո այդ հետաքրքրությունների շրջանակը տարածվի նաև Վրաստանի վրա: Ստացվում է, որ Հայաստանի
իշխանությունները մեր երկիրը վերածում են ամերիկաբրիտանական հետախուզությունների պլացդարմի՝ մեր բոլոր բարեկամ հարևանների
դեմ աշխատելու համար:
Մյուս, ոչ պակաս կարևոր, հարցն այն է, թե որտեղի՞ց Արման Բաբաջանյանին
այդ տեղեկությունը: Բայց այստեղ մի սփսփիչ հանգամանք կա. եթե այդ ՆՈՐ հակահետախուզական
ծառայության մասին տեղեկությունը հասել է Արման Բաբաջանյանին, ապա ԿՀՎ-ն ու Mi 6-ը «ռոմանոսի» մակարդակի են:
