ԵՄ արտաքին քաղաքականության պատասխանատու Կայա Կալլասը շաբաթ օրը հայտարարել է, որ ինքը «լավատեսորեն չէ տրամադրված», որ ԵՄ-ն քայլեր կձեռնարկի Իսրայելի դեմ՝ Գազայում շարունակվող պատերազմի պատճառով, քանի որ դաշինքի անդամ երկրների միջև պառակտում կա, հաղորդում է AFP-ն։
Դանիայում արտաքին գործերի նախարարների հանդիպման ժամանակ կքննարկվի իսրայելական ստարտափների ֆինանսավորումը ԵՄ-ի կողմից դադարեցնելու առաջարկը՝ որպես Գազայի հատվածում ստեղծված իրավիճակի համար նախնական պատիժ։
«Ես այդքան էլ լավատեսորեն չեմ տրամադրված և այսօր մենք, հաստատ, որոշումներ չենք կայացնի»,- լրագրողներին Դանիայում կայացած հանդիպման սկզբում ասել է Կալասը։ «Սա ազդանշան է այն մասին, որ մենք պառակտված ենք»։
Եվրոպական Միության ներսում Իսրայելին աջակցող և պաղեստինցիների կողմը պաշտպանող երկրների միջև պառակտումը հաճախ հանգեցնում է նրան, որ 27 պետություններից բաղկացած միությունը հայտնվում է բարդ կացության մեջ՝ Գազայում տիրող ծանր հումանիտար ճգնաժամի պատճառով։
ԵՄ մի շարք երկրներ պնդում են Իսրայելի նկատմամբ ավելի խիստ պատժիչ միջոցներ կիրառել, սակայն դրանք ձախողվել են։ Դանիայի արտաքին գործերի նախարար Լարս Լյոկե Ռասմուսենը, որի երկիրը հերթականությամբ նախագահում է ԵՄ-ում, պնդել է, որ միությունը «պետք է խոսքից անցնի գործի»։
Նա ասել է, որ Կոպենհագենն աջակցում է Իսրայելի հետ առևտրային համագործակցությունը դադարեցնելուն, իսրայելցի ծայրահեղ աջ նախարարների նկատմամբ պատժամիջոցներ կիրառելուն և անօրինական բնակավայրերից ներմուծումն արգելելուն։ Իսրայելը ներքին և արտաքին ճնշումների է բախվում՝ Գազայում իր հարձակումները դադարեցնելու համար, որտեղ բնակչության ճնշող մեծամասնությունը տեղահանվել է առնվազն մեկ անգամ, իսկ ՄԱԿ-ը հայտարարել է սովի մասին։
