Ռուս-չինական փոխգործակցությունը ՄԱԿ-ի հարթակում աննախադեպ բարձր մակարդակի վրա է և ամբողջությամբ համապատասխանում է համապարփակ գործընկերության և ռազմավարական համագործակցության ոգուն։ Այս մասին չինական «Սինհուա» լրատվական գործակալությանը տված հարցազրույցում հայտարարել է Ռուսաստանի նախագահ Վլադիմիր Պուտինը։
«Մեր երկրները հատուկ նշանակություն են տալիս ՄԱԿ-ի կանոնադրության պաշտպանության Բարեկամների խմբում աշխատանքին, որը կարևոր գործիք է Հարավի համախմբման համար», - նշել է նա։
ՌԴ նախագահի խոսքով՝ միավորման աշխատանքի ամենակարևոր արդյունքներից մեկը ՄԱԿ-ի Գլխավոր ասամբլեայի կողմից 2024 թվականի դեկտեմբերի 4-ին ընդունված «Գաղութատիրության վերացում՝ իր բոլոր ձևերով ու դրսևորումներով» բանաձևն է։
«Ռուսաստանը և Չինաստանը կողմ են Համաշխարհային կազմակերպության բարեփոխմանը, որպեսզի այն կարողանա լիովին վերականգնել իր հեղինակությունը և համապատասխանի ժամանակակից իրողություններին։ Մասնավորապես, մենք կողմ ենք Անվտանգության խորհրդին ավելի ժողովրդավարական բնույթ հաղորդելուն՝ դրա կազմում ընդգրկելով ասիական, աֆրիկյան և լատինաամերիկյան պետություններ։ Միևնույն ժամանակ, ցանկացած փոփոխություն պետք է ուշադիր ստուգվի», - ասել է Պուտինը։
