Վարդաշենի 68ա և 66/1 հասցեներում գտնվող հանրակացարանների բնակիչներն այսօր՝ հուլիսի 17-ին կրկին բողոքի ակցիա են իրականացրել ՀՀ կառավարության շենքի դիմաց՝ պահանջելով, որ ի վերջո գործադիրը լուծի իրենց խնդիրը. վթարային շենքերից բնակիչներին դուրս բերեն եւ ապահովեն բնակարաններով։
Ակցիայի մասնակիցներից Լիանա Հարությունյանն ասաց. «Մենք բազմաթիվ նամակներ ենք գրել, պատասխանը եկել է, որ կառավարությունը ճանաչել է գերակա շահ, դա ասվել է բանավոր, բայց գրավոր ոչ մի հիմք չկա։ Մեր պահանջն այն է, որ մեզ տան գրվոր հիմք, որ ճանաչել են գերակա շահ, որ քաղաքապետարանի հետ կարողանանք աշխատել։
հանդիպում ենք պահանջել քաղաքապետի հետ, պատասխանը եկել է, որ իմնչեւ կառավարությունն այդ որոշումը չտա, ոչ մի գործողություն իրենք չեն կարող կատարել։ Մենք հիմա դիմում ենք Փաշինյանին, որ լուծի հարցը։ Երբ դիմում ենք, ասում են՝ քննարկման փուլում է»։
Վարդաշենցիները հայտարարեցին, որ եթե իրենց խնդիրը կլուծվի, հաջորդ անգամ վրաններով են գալու կառավարության շենքի մոտ։
Նշենք, որ վթարային շենքերում 182 ընտանիք է բնակվում, այդ թվում՝ երեխաներ, ծերեր, հաշմանդամներ։ Շատերը առողջական խրոնիկ հիվանդություններ են ձեռք բերել մշտական խոնավության պայմաններում ապրելու հետեւանքով։
Հիշեցնենք, որ դեռ քարոզարշավի ժամանակ Տիգրան Ավինյանը Վարդաշենի հանրակացարանի՝ 4-րդ աստիճանի վթարային 68ա և 66/1 շենքերի բնակիչներին խոստացել էր ընտրվելու դեպքում իրենց հարցը լուծել, վթարային շենքերից նրանց դուրս բերել եւ բնակարաններով ապահովել: Այս տարի գարնանը, բնակիչներին կառավարությունից հորդորել են սպասել, բայց այդպես էլ հարցին լուծում չի տրվել։
