«Մենք ապահովել ենք անվտանգություն եւկայունություն տարածաշրջանում։ Հայաստանըկարող է դառնալ համապարփակ քննարկումների եւմիջանցքների անբաժանելի մասը»,- հայտնել է Ադրբեջանի նախագահի օգնական - Իլհամ Ալիեւի աշխատակազմի արտաքին քաղաքականության հարցերի բաժնի վարիչ Հիքմեթ Հաջիեւը «Միջին միջանցք. կյանքի նոր աշխարհաքաղաքական եւ աշխարհատնտեսական գծեր» (The Middle Corridor: A New Geopolitical and Economic Lifeline?) պանելային բանավեճում, «GLOBSEC Forum 2025»-ի շրջանակում (Պրահա), տեղեկացրել է APA-ն։
Նա նաեւ նշել է, որ Ադրբեջանը «ապահովել էտարածաշրջանի անվտանգությունը»։ Նա ընդգծել է, որ Ադրբեջանն ունի ակնկալիքներ։
«Երբ Ադրբեջանի տարածքները օկուպացիայի տակ էին, մենք հարաբերությունները դիտարկում էինք միայն հակամարտության կարգավորման գործընթացի շրջանակում։ Հակամարտության կարգավորումից հետո մենք կարծում ենք, որ Արեւելք-Արեւմուտք տրանսպորտային միջանցքի կարեւոր բաղադրիչներից մեկը երկրում անվտանգությունն ու կայունությունն է։ Սա անհրաժեշտ է այս միջանցքի լիարժեք եւ արդյունավետ գործունեության համար։ Մենք ապահովել ենք անվտանգությունն ու կայունությունը տարածաշրջանում։ Հայաստանը կարող է դառնալ տարածաշրջանում անցկացվող համապարփակ քննարկումների եւ միջանցքների անբաժանելի մասը։ Սա հնարավոր է։ Եվ մենք, բնականաբար, սպասումներ ունենք Հայաստանից։ Հայաստանը Նախիջեւանը շրջափակման մեջ է պահել 30 տարի։ Եվ հիմա մենք սպասում ենք, որ նրանք կանեն առաջին կարեւոր քայլը, այսինքն՝ քայլ Զանգեզուրի միջանցքի վերաբերյալ։ «Միջանցք» բառը նյարդայնացնում է իմ գործընկերներին Հայաստանում։ «Թող անվանեն այն, ինչ ուզում են։ Բայց նախ մենք ուզում ենք կապ հաստատել Նախիջեւանի հետ, քանի որ 30 տարի մենք զրկված ենք եղել այդ հնարավորությունից։ Նախիջեւանի հետ կապ հաստատելուց հետո, կարծում եմ, Հայաստանի համար կարող են բացվել նաեւ այլ հնարավորություններ։ Մենք ուզում ենք տեսնել Հայաստանը տարածաշրջանային տրանսպորտի մաս կազմող կառույցում»,- ասել է Հաջիեւը։
