Վրաստանն Ուկրաինայի քաղաքացիների համար կրճատել է առանց վիզայի երկրում մնալու ժամկետը: Այս մասին հայտնում են տեղական լրատվամիջոցները։

Մինչ այս առանց վիզայի Վրաստան մուտք գործած ուկրաինացի քաղաքացիների երկրում մնալու իրավունքը 3 տարի էր, այսուհետ այն կդառնա 1 տարի։

«Ուկրաինայի քաղաքացիներն իրավունք ունեն մուտք գործելու Վրաստան առանց վիզայի և մնալու 1 տարի։ Դրանից բացի, Ուկրաինայի այն քաղաքացիների, որ մուտք են գործել և մնացել Վրաստանում մինչև 2025 թվականի փետրվարի 24-ը, երկրում մնալու իրավունքը կերկարաձգվի մինչև 2026 թվականի փետրվարի 24-ը»,- նշված է որոշման մեջ։

Այսուհետ, բոլոր երկրների քաղաքացիները, բացի Չինաստանից, առանց վիզայի Վրաստանում կարող են մնալ 1 տարի։ Իսկ  Չինաստանի քաղաքացիներն իրավունք ունեն մուտք գործելու Վրաստան առանց վիզայի և մնալու 30 օր միայն զբոսաշրջային նպատակներով։