Ադրբեջանի նախագահ Իլհամ Ալիևը նշել է Հայաստանի հետ խաղաղության պայմանագրի ստորագրման երկու հիմնական պայմանը և հիմանավորել, թե ինչո՞ւ են այդ պայմաններն առաջադրում:

«Մինչ օրս խաղաղության պայմանագրի տեքստը լիովին համաձայնեցված է և բաղկացած է 17 կետից։ Ադրբեջանն այստեղ լրացուցիչ պայմաններ չի առաջադրում։ Մեր պայմանները Հայաստանին հայտնի են, նոր չեն։ Մենք երկար ժամանակ առաջ ենք տանում այս պայմանները։ Սակայն Հայաստանից դեռ լուրջ արձագանք չենք ստացել»,- ԶՄԼ-ին ասել է Ադրբեջանի նախագահը։

Ստորագրման նախապայմաններից առաջին ԵԱՀԿ Մինսկի խմբի լուծարումն է, երկրորդը՝ ՀՀ Սահմանադրության պրիամբուլան փոփոխելը։

«Հայաստանի սահմանադրությունը հղում է պարունակում Հայաստանի Անկախության հռչակագրին։ Այնտեղ դրույթ կա, որ Ադրբեջանի օրինական, պատմական տարածքը միավորված է Հայաստանին, և դա համարվում է բացահայտ տարածքային պահանջ մեր դեմ։ Ուստի Հայաստանի Սահմանադրությունից այս դրույթի հանումը մեր օրինական պահանջն է։ Եթե ​​Հայաստանն իսկապես ցանկանում է խաղաղության պայմանագիր կնքել, ապա պետք է ընդունի Ադրբեջանի այս երկու օրինական պայմանները»,- ընդգծել է Ադրբեջանի ղեկավարը։

Նախ հարկ է նշել, որ Ալիևն առաջին անգամ է հստակեցնում, թե Սահմանադրությունում ինչն է իրեն խանգարում, թեև հասկանալի էր։ Սահմանադրության փոփոխությունը, որի մասին Փաշինյանի թիմը նախակինում խոսում էր, այլ է։ Իսկ պրիամբուլան փոփոխելու համար անհրաժեշտ է նոր Սահմանադրություն, ինչը տևական ժամանակ Նիկոլ Փաշինյանը պրոպագանդում է։

Հիմա ստացվում է՝ պայմանագիր, որի ստորագրման համար պայմաններ են առաջ քաշվում: Սա ինչ է, եթե ոչ ուժի սպառնալիքի տակ ստորագրված փաստաթուղթ։

Ի դեպ՝ դրա բոլոր հայտնի կետերը ձևավորված են Ադրբեջանի պահանջների և սպառնալիքների ներքո։ Իսկ մյուս կետերը գաղտնի են պահվում ՀՀ քաղաքացուց։

Ընդհանրապես պայմանագիրը ենթադրում է երկու կողմերի իրավունքներ և պարտականություններ, սակայն այս դեպքում ՀՀ-ի իրավունքները դուրս են մնում՝ առնվազն հայտնի կետերի մասով։ Գուցե նաև դա է պատճառը, որ ՀՀ-ն պայմանագրի փոխարեն ենթադրյալ ստորագրվող փաստաթուղթն անվանում է համաձայնագիր, որի իրավական կարգավիճակն, այո՛, ենթադրում է, համաձայնել մյուս կողմի պայմաններին։

Ստացվում է, որ ՀՀ քաղաքացու թիկունքում ՀՀ Սահմանդրությունը, անկախությունը երաշխավորող հռչակագիրը փոխվում է, զիջվում է Ադրբեջանի հետ ինչ-որ ենթադրայլ փաստաթղթի, որտեղ ՀՀ-ն իրավունք չունի: Միաժամանակ այն կատարվում է միջազգային կոնվենցիաների խախտմամբ, այն է՝ ուժի սպառնալիքը, և դա քաղաքացիներին մատուցվում է «Իրական Հայաստան» փաթեթավորմամբ։ Ի դեպ հարկ է նշել, որ ո՛չ ՀՀ վարչապետը, ո՛չ ԱԳՆ-ն չեն արձագանքել Ալիևի պայմանների վերաբերյալ հայտարարությանը։