Վաղ առավոտից վարչապետ Նիկոլ Փաշինյանն արդեն երրորդ գրառումն է անում և պատասխանում այն հարցին, թե ո՞վ է իրեն բերել իշխանության։

«Երկու կիսամաշ դեմքեր իրենց շրջապատներով վիճում են, թե ո՞վ է ինձ իշխանության բերել, միմյանցից պահանջելով ասել ճշմարտությունը»,- գրել է Փաշինյանը:

Նախ այդ երկու ուժերը չեն վիճում թե իրենցից որ մեկն է իշխանության բերել Փաշինյանին։ Նույնիսկ չի քննարկվում, որ Փաշինյանի իշխնության գալու հետ որևէ կապ ունի Ռոբերտ Քոչարյանը։ ՀՀԿ-ն Քոչարյանին մեղադրում է Արմեն Սարգսյանին ճանաչելու մեջ, իրենցից առաջ թողած բանակցությունների մեջ, Սերժ Սարգսյանի իշխանությանը քննադատելու մեջ և այլն, բայց ոչ երբեք հանձնելու մեջ կամ նրան գալուն աջակցելու մեջ։

Իսկ ահա երկրորդ նախագահի աջակիցներն իրապես շարունակում են մեղադրել Սերժ Սարգսյանին՝ իշխանությունը հանձնելու, նվիրելու, բարձիթողի վիճակի հասցնելու մեջ։

Ըստ քոչարյանականների և քաղաքականապես չեզոք մարդկանց՝ ՀՀԿ-ականներն այստեղ իրենց մեղքի էական բաժինն ունեն։ Եթե իշխանափոխություն է տեղի ունեցել, ապա դա կա՛մ վատ կառավարման արդյունք է և ՀՀ քաղաքացին որոշել է, որ նրանց պետք է հեռացնել, կա՛մ դա անուղղակի ապաշնորհությամբ Նիկոլ Փաշինյանին իշխանության բերել է։ Սերժ Սարգսյանն էլ ասել է, որ Նիկոլը ճիշտ էր, ինքն էլ՝ սխալ։ Եթե իշխանության հանձնում կամ նվիրում էր, ապա քաչարյանականների մեղադրանքը տեղին է ուղիղ իմաստով։  Հակառակ պարագայում՝ մարդ, ով խոստացել է չառաջադրվել, հայտարարել էր,  որ որևէ պաշտոնի չի հավակնում, բայց մեկ է, ամեն գնով դառնում է վարչապետ՝ ուղղակի, առանց պատճառ հրաժարական չէր տա։

ՀՀԿ-ականները, բնականաբար, այս հարցում արդարացումներ են փնտրում՝ մեկ ինչ-որ բաներում մեղադրելով Քոչարյանին, մեկ էլ Փաշինյանին, երբեմն էլ Լևոն Տեր-Պետրոսյանին, սակայն չեն դիտարկում այն, որ եթե իրենց քննադատում են և՛ առաջին, և՛ երկրորդ նախագահները, և՛ այն բազմությունը, որ 2018թ-ին Հանրապետության հրապարակում էր, և հիմա շատ ու շատ արած-չարածների մեջ մեղադրում է ներկա իշխանությունը, իսկ հասարակության մի մասը պարզապես չի ներում նրանց, գուցե իրապե՞ս մտահոգվելու կարիք կա և արդարանալու փոխարեն, պարզապես սխալներն ընդունել և ներողութուն խնդրել է պետք։

Իսկ թե ինչո՞ւ է ՀՀ երկու նախկին նախագահների խնդիրներին այսքան բուռն արձագանքում Նիկոլ Փաշինյանը, կարելի է պարզապես ենթադրել։

Մեկ անգամ՝ ԱԺ-ում արդեն ասել էր, որ իր կարծիքով իրեն իշխանության է բերել ժողովուրդը, առավոտյան մի հատ էլ վերահաստատեց։ Մի քանի րոպե անց էլ գրեց․ «Ինձ իշխանության ոչ ոք չի բերել: 2018թ. Ժողովրդական, ոչ բռնի, թավշյա հեղափոխությունը իշխանության է բերել Ժողովրդին»:

Եվս մի քանի րոպե՝ և հաջորդ գրառումը․ «Ընտրակեղծարար-ուզուրպատորնե՛ր, չմոռանաք ասել, թե ձեզ իշխանության բերողներն ինչի՞ համար են ձեզ իշխանության բերել Հայաստանի Հանրապետությունում: Դուք դա չեք ասի, ես ասեմ. որ Հայաստանի Հանրապետությունը երբեք անկախ պետություն չլինի, որ պետություն չլինի ընդհանրապես»։

Այս գրառումներից կարելի է ենթադրել, որ վարչապետը կա՛մ  չի հավատում իր ասածին և ամեն կերպ փորձում է համոզել, որ ժողովուրդն իրեն  իշխանություն է տվել, կա՛մ էլ ամեն կերպ  երկրորդ նախագահի աջակիցներին համոզում է, որ ոչ՝ դա Սերժ Սարգսյանը չէր, որ իրեն իշխանություն տվեց, նվիրեց կամ հանձնեց։