«Վերջերս խոսել եմ այդ մասին, որ սփյուռքից ավելի մեծ արտագաղթ կա, քան Հայաստանի Հանրապետությունից»։ Այս մասին շվեյցարահայ համայնքի ներկայացուցիչների հետ հանդիպման ընթացքում ասել է Նիկոլ Փաշինյանը։
«Մարդին ինձ ասում են՝ սփյուռքից արտագաղթը ո՞րն է։ Սփյուռքից արտագաղթն այն է, երբ մարդը լինելով ծագումով հայ, հայերեն չի խոսում, չի կարդում, հայկական ավանդույթներով չի ապրում։ Մի X պահի, թեկուզ ազգանունը պահպանում է, բայց իրեն չի ասոցացնում հայ ազգի հետ, դա արտագաղթ է։ ՀՀ–ում երբեք այդքան մեծ արտագաղթ չի եղել, որքան կա հիմա սփյուռքում»,–ասել է նա։
Փաշինյանի խոսքով, պետք է արձանագրել, որ մոտ հիսուն տարի առաջ սփյուռքի 90 տոկոսը ազգային կազմակերպություններից որևէ մեկի հետ փոխկապակցված էր։
«Դրանք կլինեին կուսակցությունները, Հայ առաքելական եկեղեցին, Հայ բարեգործական ընդհանուր միությունը և բազմաթիվ այլ կազմակերպություններ։ Այսօր այսօր սփյուռքի 90 տոկոսն այդ կազմակերպություններից որևէ մեկի հետ կապված չէ։ Մենք կորցնում ենք սփյուռքը, այն փրկելու միակ եղանակը Հայաստանի Հանրապետությունն է, և այն, որ մարդիկ ՀՀ–ն ասոցացնեն հայրենիքի հետ, հակառակ դեպքում մենք սփյուռք չենք ունենա։ Ինձ համար շոկ է եղել, երբ սփյուռքահայի հետ խոսել եմ, նա ասել է հայրենիք, և ես հասկացել եմ, որ նա Լիբանանն ու Բեյրութը նկատի ունի»,–նշել է Նիկոլ Փաշինյանը։
