Ադրբեջանի փոխարտգործնախարար Էլնուր Մամեդովը հայտարարել է, որ «Հայաստանի հետ հնարավոր է համաձայնության գալ»։ Այս մասին, ըստ ադրբեջանական ԶԼՄ-ների, Մամեդովն ասել է «Ադրբեջանի և Հայաստանի միջև խաղաղության համաձայնագրի հիմնական խոչընդոտները» թեմայով միջազգային կոնֆերանսի ժամանակ:

Պաշտոնյան նաև հույս է հայտնել, որ Ադրբեջանը «շուտով կկարողանա հասնել խաղաղության և առաջընթացի՝ Կովկասում»։

Ռուսական «Разведчик» ամսագրին տված հարցազրույցում  Ռուսաստանի Դաշնության արտաքին հետախուզության ծառայության տնօրեն Սերգեյ Նարիշկինն էլ հայտարարել է․ «Հայաստանն ու Ադրբեջանը այնքան էլ ականջալուր չեն խաղաղ կարգավորման վերաբերյալ ԱՄՆ-ի և ԵՄ-ի առաջարկություններին՝ նախընտրելով բոլոր հարցերն ինքնուրույն լուծել»։

Ռուս պաշտոնյաի խոսքով՝ ԱՄՆ-ը կորցնում է նախաձեռնությունը բոլոր ճակատներում, իսկ հետխորհրդային տարածքում Վաշինգտոնի մոտ ընդհանրապես ձախողումներ են սկսվել։

ԱՄՆ-ն ինքն էլ տարբեր պաշտոնյաների շուրթերով հայտարարում է, որ Հայաստան-Ադրբեջան երկխոսությունը տեղի է ունենում երկու երկրների միջև։ Ակնհայտ է նաև այն, որ միակ ռեալ միջամտող երկիրը Թուրքիան է։

Պարզ է դառնում, որ թուրք-ադրբեջանական ճնշումների ներքո Ադրբեջանի ԱԳՆ-ն պետք է խոսի հաջողությունների մասին։ Թուրքիայի դիրքորշումները հաստատ հայանպաստ չեն լինի։ ԱՄՆ-ն Արցախի, Հայաստանի և Ադրբեջանի խնդիրի կարգավորումը վստահել է ՆԱՏՕ-ի անդամ պետություն Թուրքիային, ով նաև շահագրգիռ կողմ է։ Իհարկե, այստեղ խոչընդոտներ կան՝ Իրանի և Ռուսաստանի տեսքով, ինչն էլ թուրք-ադրբեջանական տանդեմը փորձում է վերացնել ՀՀ-ի թեթև ձեռքով՝ ՀՀ իշխանությանը ստիպում է հայտարարել, որ չկա ավելի լավ բան, քան Ադրբեջան հետ առանց միջնորդ, ուղիղ բանակցություններն են։ Իսկ արդյունքում՝ նախաձեռնվել է փոխել ՀՀ Սահմանադրությունը, զինանշանը, օրհներգն արդեն իսկ հակասահմանադրական որոշմամբ փոխվել է։ Սահմանազատման կանոնակարգը հաստատված է Ադրբեջանի ցանկությամբ և առանց դրա հաստատման էլ, Տավուշում արդեն իսկ սահմանազատում եղավ։ Մինչ այժմ բանակցություններում գրանցված հայանպաստ որոշումներ չկան։ Հիմա էլ, Սիրիայում տիրող իրավիճակով պայմանավորված, Ռուսաստանի և Իրանի դիրքերը տարածաշրջանում թուլանում են և պատահական չէ, որ այս ֆոնին է Ադրբեջանը հայտարարում, թե Հայաստանի հետ հնարավոր է պայմանավորվել։