33 տարի առաջ այս օրը ընդունվեց որոշում, որը դարձավ Արցախի անկախության ձեռքբերման հիմքը։ Այս մասին լրագրողների հետ զրույցում սեպտեմբերի 2-ին ասել է Արցախի նախագահ Սամվել Շահրամանյանը։
«Ցավոք, այսօր Արցախը կորցրել ենք։ Այս օրը մենք նշում էինք որպես տոն, բայց այսօր սա վշտի օր է։
Մենք մեծ հույսեր ենք փայփայում, որ մեզ կհաջողվի վերադարձնել մեր հայրենիքը։ Հարցը, թե ինչ կարգավիճակով եւ ինչպես վերադարձնել Արցախը, մշտապես մեր օրակարգում է։ Այս հարցի լուծման համար Արցախի խորհրդարանը ստեղծել է կոմիտե, որը ղեկավարում է Հայաստանի արտաքին գործերի փոխնախարար Վարդան Օսկանյանը։ Մենք պարբերաբար հանդիպում եւ քննարկում ենք հնարավոր վերադարձի հարցերը։ Տարբերակները եւ առաջարկները տարբեր են։ Արցախցիները շատ են ցանկանում վերադառնալ Արցախ եւ ապրել իրենց հայրենիքում, հայկական Արցախում։
Մենք պետք է պատրաստ լինենք։ Մեր վերադարձը հնարավոր կլինի միջազգային երաշխիքների դեպքում, արժանավոր, արդարացի պայմաններով, եւ որ գլխավորն է՝ մենք պետք է մեզ անվտանգության մեջ զգանք։ Եթե այս չափորոշիչներն ապահովվեն, մենք պատրաստ ենք բանակցություններ վարել այս հարցի արագ լուծման համար»,- նշել է Շահրամանյանը։ Նա տեղեկացրել է, որ Նիկոլ Փաշինյանի հետ չի հանդիպել։ Շահրամանյանը հավաստիացրել է, որ չի փորձել հանդիպել նրա հետ։ «Դա պետք է բնական երեւույթ լինի, որպեսզի այդ հանդիպումը կայանա։ Բայց մենք մինչ այժմ չենք հանդիպել։ Ես չգիտեմ, թե հարցերի ինչ փաթեթ է քննարկել Հայաստանի կառավարությունը։ Մենք ոչ մի առաջարկ Հայաստանի կառավարությանը չենք ներկայացրել»,- ավելացրել է նա։
